पणजी: निवडणुकीत उमेदवारांचे नाव किमान तीन महिने अगोदर जाहीर होण्याची गरज आहे. काँग्रेसने उमेदवारांची नावे उशिरा जाहीर केल्याने त्यांना प्रचार करण्यास वेळ कमी मिळाला त्याचा परिणाम काही उमेदवार काही मतफरकाने पराभूत झाले, असे मत आमदार दिलायला लोबो यांनी या सत्कारावेळी बोलताना व्यक्त केले. शिवोलीतून निवडून आलेल्या पहिल्या महिला आमदार दिलायला लोबो यांचा आज काँग्रेस प्रदेश महिला मोर्चातर्फे पणजीतील काँग्रेस मुख्यालयात सत्कार करण्यात आला.

या कार्यक्रमाला काँग्रेस प्रदेश महिला मोर्चा अध्यक्ष बीना नाईक, डॉ. प्रमोद साळगावकर तसेच मोर्चाचे पदाधिकारी उपस्थित होते. काँग्रेस आमदार दिलायला लोबो यांनी शिवोलीत केलेल्या धडाकेबाज प्रचारामुळे त्या निवडून आल्या. निवडणुकीची तयारीही त्यांनी सर्वांच्या आधीच सुरू केली होती. त्याचा लाभ त्यांना झाला. त्यामुळे काँग्रेसच्या महिला कार्यकर्त्यांनी तेच ध्येय ठेवून कामाला लागावे,असे मत व्यासपीठावरील वक्त्यांनी व्यक्त केले.

आमदार लोबो म्हणाल्या की, गोमंतकीयांना भाजप सरकार पुन्हा सत्तेत नको, असे वाटत होते. या निवडणुकीत 66 टक्के मतदारांनी भाजपविरोधी मतदान केले. मात्र, ही मते विभागणीचा लाभ भाजपला झाला. भाजपविरोधी मतदारांची मने वळवण्यात काँग्रेसला अपयश आले,असेही त्या म्हणाल्या.