वास्कोचे आमदार कार्लोस आल्मेदा यांनी आमदारकीचा राजीनामा दिला, तसेच भाजपच्या प्राथमिक सदस्यत्वाचाही राजीनामा दिला आहे. विधीमंडळ सचिव एन ए उल्मन यांच्याकडे आपला आमदारकीचा राजीनामा सुपूर्द केला आहे. वास्कोत आल्यानंतर आल्मेदा कार्यकर्त्यांबरोबर बैठकीस व्यस्त होते.

वास्को मतदारसंघातून दोन वेळा निवडून आलेले वास्कोचे आमदार तथा कदंब महामंडळाचे अध्यक्ष तसेच तीन वेळचे नगरसेवक तथा नगराध्यक्षपद भूषविलेले कार्लोस आल्मेदा यांनी आपल्या आमदारकीचा राजीनामा दिला.

मुरगाव तालुक्यातील चारही मतदारसंघातील दोन आमदारांनी आपल्या आमदारकीचा (MLA) राजीनामा दिला आहे. तर मूरगाव मतदारसंघातून मिलिंद नाईक यांनी आपल्या मंत्रीपदाचा राजीनामा दिला आहे. अशा प्रकारे मुरगाव तालुक्यातील मतदारसंघातून (Constituency) भारतीय जनता पक्षाचे (BJP) पाठबळ कमी झाल्यातच जमा आहे. कारण मुरगाव तालुक्यातील चारही मतदारसंघातून भाजपाचा बालेकिल्ला होता. आता कुठ्ठाळी मतदारसंघातून एलिना साल्ढाणा व वास्को मतदारसंघातून कार्लोस आल्मेदा यांनी तर मूरगाव मतदारसंघातून मंत्री मिलिंद नाईक यांनी आपल्या मंत्री पदाचा राजीनामा दिल्याने मूरगाव तालुक्यात भाजपचे पानीपत झाले आहे.

आता सगळी भिस्त कार्यकर्त्यांवर अवलंबून असून आपला मतदारसंघ साबूत ठेवण्यास माजी आमदार व मंत्री समर्थ आहे की नाही हे येणाऱ्या विधानसभा निवडणुकीत (Assembly elections) समजेल. राजीनामा देण्याचे कारण आल्मेदा यांना विचारले असता, भाजपने मला दुखावल्यानेच मला पक्ष सोडने भाग असल्याचे ते म्हणाले. आता 2022 मधील विधानसभा निवडणुकीसंदर्भात आज मी माझ्या कार्यकर्त्याबरोबर बैठकीत चर्चा करून योग्य तो निर्णय घेणार असल्याचे त्यांनी सांगितले.

तसेच काही वर्षापूर्वी मी कृष्णा साळकर यांच्याविरुद्ध कोमुनिंदाद जमीन घोटाळा प्रकरणी एक तक्रार दिलेली आहे. भाजपने कृष्णा साळकर यांना पक्षात घेतल्यानंतर मला त्यांच्याबरोबर काम करण्यास पक्ष सांगत असून मी मुळीच ते करू शकत नाही. मी स्वबळावर माझ्या कार्यकर्त्यांबरोबर पुढील निर्णय घेईल. त्यानुसार आपण भाजप पक्षातून आणि आमदार पदावरून राजीनामा दिल्याचे सांगितले.

वास्को मतदारसंघाला सरकारने दुर्लक्ष केल्यामुळे विकास कामे रेंगाळत असल्याचा आरोप आल्नेदा यांनी केला. यासर्व प्रकारामुळे मी दुखावलेला असून यामुळेच मी राजीनामा दिल्याचे सांगितले. 2022 सालातील निवडणूक कुठल्या पक्षातून लढवणार, ते माझ्या कार्यकर्त्यांबरोबर बैठक घेऊनच लवकरच योग्य निर्णय घेणार असल्याचे आल्मेदा यांनी सांगितले.