पणजी: मिरामार- दोनापावला रस्त्यावर शारदा मंदिर स्कूलच्या प्रवेशद्वारापासून जवळ असणारा आणि धोकादायक बनलेला पदपूल अखेर महानगरपालिकेने हटविला आहे. शनिवारी या पुलाचा अर्धाभाग हटविला गेला होता. आज सकाळी उर्वरित अर्धा भाग हटविण्यात आला. लोखंडी असलेला हा पूल गॅस कटरच्या साह्याने कापून काढण्यात आला.

मिरामार येथील पूल हटविण्याचे आदेश जिल्हाधिकाऱ्यांनी देताच महानगरपालिकेने शुक्रवारीच या कामाला सुरुवात केली. दहा लाख रुपये खर्च करून पदपूल हटविण्यात आला आहे. पुलाचा वरील भाग काढून तो रस्त्याच्या बाजूला ठेवला असून, त्याचे भाग कापल्यानंतर तेथून ते हटविले जाणार आहे.

गेली तीन दिवस महानगरपालिका अभियंते विकास पार्सेकर व त्यांचे सहकारी दिवसांतून तीनवेळा त्याठिकाणी भेट देऊन पाहणी करीत आहेत. याशिवाय वाहतूक विभागाचे पोलिसही याठिकाणी हजर होते.

पुलाचे सांगाडे पदपथावर

शुक्रवारपासून मिरामार ते दोनापावला रस्ता बंद झाल्याने रविवारी सायंकाळपर्यंत वाहने मिरामार इंटरनॅशनल हॉटेल, सायन्स सेंटर मार्गे ये-जा करीत होती. सायंकाळी उशिरा आठच्या सुमारास वाहतूक खुली करण्यात आली. पुलाचे सांगाडे रस्त्याच्या बाजूच्या पदपथावर ठेवण्यात आले असून, उद्या, त्याची कापणी होऊन त्याचे भाग वेगवेगळे केले जातील, असे महानगरपालिकेच्या अधिकाऱ्यांनी सांगितले.