पणजी: सरकारच्या सरकारी कामांवरील लोकांचा विश्वास कमी होऊ लागला आहे. याचेच अजून एक उदाहरण म्हणजे गेल्यावर्षी मिरामार समुद्रकिनाऱ्यावर बांधण्यात आलेले वूडन फ्लोअर. यावर्षी वूडन फ्लोअर किनाऱ्यावरील वाळूत गायब झाला असल्याने या कामाचा दर्जादेखील स्पष्ट झाला आहे.

वूडन फ्लोअर हा प्रकल्प पर्यटकांना आकर्षित करणारा होता. पर्यटकांना आकर्षित करण्यासाठी सरकारने ‘अमृत मिशन’अंतर्गत हा प्रकल्प उभारला होता. याचे व्यवस्थापन योग्यप्रकारे न झाल्याने सर्व खर्च वाळूत गेल्याचे दिसत आहे.

मिरामार येथील वूडन फ्लोअरमधील वूडन नाहीसे झाले आहेत. तसेच फ्लोअरची मांडणी वर-खाली झाल्याने पावसाचे पाणी येथे साचले आहे. संबंधित विभागाने काम केल्यावर त्याची देखभाल करण्यावरदेखील भर द्यायला हवा होता. मात्र, ते न केल्याने आज कोट्यवधी रुपयांचे नुकसान झाले आहे. सरकार सौंदर्यीकरणावर भर देत असले तरी ते टिकवण्याकडे सरकारचे दुर्लक्ष होते.

कामाचा सुमार दर्जा

भाजप सरकारचा ‘मिशन टोटल कमिशन’ असा नारा आहे, असे आरोप वारंवार काँग्रेसने केले आहेत. या आरोपांचे खंडन उत्तम दर्जाचे काम करून केले पाहिजे होते; पण सरकारने कामाच्या दर्जावर भर न दिल्याचे मिरामार येथील वूडन फ्लोअर प्रकल्पावरून दिसून येते.