Goa Congress: आगामी लोकसभा निवडणुकीच्या पार्श्वभूमीवर काँग्रेसने दक्षिण गोव्यात बुथनिहाय बैठकांना आजपासून सुरूवात केली. वेळ्ळी येथे झालेल्या बैठकीत दक्षिण गोवा मतदारसंघात अल्पसंख्यांक उमेदवारच द्यावा, तो बदलला जाऊ देऊ नये, अशी ठाम मागणी कार्यकर्त्यांनी केली.

या बैठकीस प्रदेशाध्यक्ष अमित पाटकर, विरोधी पक्षनेते युरी आलेमाव, खासदार फ्रान्सिस सार्दिन, उपाध्यक्ष एम. के. शेख, कॅ. विरियातो फर्नांडिस, मिरियानो रिबेलो, जिल्हा पंचायत सदस्य, सरपंच, चिंचोणे-असोळणा पंच सदस्य उपस्थित होते.

काँग्रेसचे अस्तित्व राहिले नसल्याचा अपप्रचार सत्ताधाऱ्यांकडून होत आहे. परंतु या निवडणुकीत काँग्रेस पक्ष आपली ताकद दाखवून देईल.

महागाई, भ्रष्टाचार, बेरोजगारी अशा गर्तेत समाज अडकला आहे आणि तोच समाज भाजपला सत्तेवरून खाली खेचणार आहे. पक्षाची भूमिका, धोरणे गट समित्यांनी सर्वसामान्य मतदारांपर्यंत नेणे आवश्यक आहे, असे उपस्थित मान्यवरांनी सांगितले.