माशेल: माशेल येथून 13 वर्षे 5 महिन्यांची एक अल्पवयीन विद्यार्थिनी बेपत्ता झाल्याची धक्कादायक घटना समोर आली आहे. याप्रकरणी म्हार्दोळ पोलिसांनी अज्ञात व्यक्तीविरुद्ध अपहरणाचा गुन्हा दाखल केला असून पोलीस निरीक्षक योगेश सावंत यांच्या मार्गदर्शनाखाली अधिक तपास सुरु आहे.

मुलगी घरी परतलीच नाही

दरम्यान, सदर विद्यार्थीनी 7 जून रोजी सकाळी आपल्या घरातून शाळेसाठी बाहेर पडली होती, मात्र त्या दिवशी ती घरी परतलीच नाही. घरच्यांनी तिचा सर्वत्र शोध घेतला, मात्र कुठेही तिचा ठावठिकाणा लागला नाही. त्यामुळे अखेर त्यांनी पोलिसांकडे तक्रार दाखल केली. पोलिसांनी तातडीने हरवल्याची नोंद घेतली असून प्राथमिक चौकशीअंती अज्ञात व्यक्तीविरोधात अपहरणाचा गुन्हा नोंदवण्यात आला आहे.

म्हार्दोळ पोलिसांकडून तपास सुरु

म्हार्दोळ पोलिसांनी मुलीच्या फोटोसोबत तपशील परिसरातील पोलिस ठाण्यांना पाठवून दिला आहे. तसेच सीसीटीव्ही फुटेज, मोबाईल लोकेशन आणि इतर तांत्रिक पुराव्यांच्या आधारे तपास सुरु करण्यात आला आहे. पोलीस निरीक्षक योगेश सावंत यांनी नागरिकांना सहकार्य करण्याचे आवाहन केले असून, संबंधित विद्यार्थिनीबाबत (Student) कोणालाही काही माहिती मिळाल्यास म्हार्दोळ पोलिसांशी त्वरित संपर्क साधावा, असे आवाहन करण्यात आले आहे.

परिसरात चिंतेचे वातावरण

दरम्यान, ही घटना संपूर्ण परिसरात चिंता आणि अस्वस्थता निर्माण करणारी ठरत असून, पोलिसांकडून विद्यार्थिनीचा लवकरात लवकर शोध लागेल अशी अपेक्षा व्यक्त केली जात आहे.