Goa Company to Supply Six Hovercrafts to Indian Coast Guard

पणजी: संरक्षण मंत्रालयाने गुरुवारी गोव्यातील चौगुले आणि कंपनी प्रा.लि.सोबत भारतीय तटरक्षक दलासाठी एकूण ३८७.४४ कोटी रुपयांच्या सहा एअर कुशन वाहनांच्या (ACV) खरेदीसाठी एका करारावर स्वाक्षरी केली. पाण्यावर तसेच जमिनीवर सरकणाऱ्या या नौका ज्यांना ‘हॉवरक्राफ्ट्स’ असे देखील म्हणतात, त्यांची खरेदी (भारतीय) या श्रेणी अंतर्गत केली जाणार आहे.

केंद्र सरकारच्या ‘आत्मनिर्भर भारत’ संकल्पनेनुसार ही स्वदेशी बनावटीची एअर कुशन वाहने प्रथमच देशात तयार केली असून देशाच्या बांधणी क्षेत्रातील एक महत्त्वपूर्ण पाऊल आहे. यामुळे तांत्रिक कौशल्य व स्वदेशी निर्मितीला सहाय्य मिळणार असून त्यामुळे सूक्ष्म लघु, मध्यम (एमएसएमई) क्षेत्राचा वैशिष्ट्यपूर्ण विकास साध्य होईल.

‘हॉवरक्राफ्ट्स’ची वैशिष्ट्ये

या खरेदीचे उद्दिष्ट भारतीय तटरक्षक दलाच्या क्षमतेला चालना देत सागरी सुरक्षेकडे अधिक लक्ष केंद्रित करणे हे आहे. अतिवेगवान किनारा गस्त (हायस्पीड कोस्टल पेट्रोलिंग), पूर्व टेहेळणी, शोध आणि बचावकार्य तसेच संकटात सापडलेल्या जहाजांना आणि त्यावरील कर्मचाऱ्यांना मदत अशा बहुउद्देशीय सागरी क्षेत्रासाठी या आधुनिक वाहनांचा वापर केला जाईल.