डिचोली: मुख्यमंत्री डॉ. प्रमोद सावंत यांच्यासह मंत्री, आमदारांनी शिरगावच्या श्री लईराई देवीच्या जत्रोत्सवाला उपस्थित राहून देवीचे दर्शन घेतले. सावंत यांच्यासमवेत मयेचे आमदार प्रेमेंद्र शेट हेही उपस्‍थित होते. तत्पूर्वी, सकाळी थिवीचे आमदार तथा मंत्री नीळकंठ हळर्णकर, पर्येच्‍या आमदार दिव्या राणे यांनीही देवीचे दर्शन घेतले. दरम्‍यान, जत्रा आणि कौलोत्सवानिमित्त शिरगावात पुढील चार-पाच दिवस भक्तांची प्रचंड गर्दी होणार आहे. हा उत्सव निर्विघ्नपणे साजरा होण्यासाठी सर्व भक्तांनी सहकार्य करावे असे आवाहन करून मुख्यमंत्री सावंत यांनी सर्व भक्तगणांना जत्रोत्‍सवाच्‍या शुभेच्छा दिल्या.