राज्याचे बांधकाम आणि पर्यावरण मंत्री निलेश काब्राल (Minister Nilesh Cabral) पेडणे येथील दौऱ्यावर असताना घडलेल्या एका घटनेचा व्हिडिओ सध्या सोशल मिडियावर चांगलाच व्हायरल होत आहे. मंत्री काब्राल या व्हिडिओमध्ये पेडणे आमदार प्रवीण आर्लेकर (MLA Pravin Arlekar) यांच्यावर चांगलेच भडकल्याचे दिसत आहेत, याशिवाय त्यांनी उपजिल्हाधिकारी यांना देखील फैलावर घेतले आहे.

मंत्री निलेश काब्राल यांनी उपजिल्हाधिकारी कोण माहिती नाही का? असे म्हणत आमदार प्रवीण आर्लेकर यांच्यावर भडकल्याचे दिसत आहे. 'ए प्रविण, डेप्युटी कलेक्टर खबर ना कोण तो? आ??? लाय मरे ताका फोन' असे म्हणत काब्राल आर्लेकर यांच्यावर भडकले. याचा व्हिडिओ सध्या सोशल मिडियावर चांगलाच व्हायरल होत आहे.

तसेच, फोन लावल्यानंतर मंत्री काब्राल उपजिल्हाधिकारी यांना देखील खडेबोल सुनावताना दिसत आहेत. काब्राल यांना हवी असलेली माहिती आजच उशिरापर्यंत त्यांना देण्यात यावी अशा शब्दात काब्राल यांनी उपजिल्हाधिकाऱ्यांना सुनावले.

तर मंत्रिपदाचा राजीनामा देणार

बांधकाम मंत्री निलेश काब्राल पेडणे दौऱ्यावर असताना त्यांना चांदेल प्रकल्पाबाबत प्रश्न विचारण्यात आला. त्यावर चांदेल प्रकल्पासाठी आवश्यक असलेली टाकी उभारण्यासाठी जमीन मिळाल्यानंतर एका वर्षाच्या आत पाण्याची समस्या सोडवू असे आश्वासन दिले. अन्यथा मंत्रिपदाचा राजीनामा देणार अशी ग्वाही काब्राल यांनी यावेळी दिली.