Minister Govind Gawade: कला अकादमीचा सुरक्षेचा प्रश्‍न आता ऐरणीवर आल्याने तिच्या सुरक्षेचे संपूर्ण लेखापरीक्षण केले जाईल.

जोपर्यंत अकादमीच्या सुरक्षा लेखरपीक्षणाचा अहवाल येत नाही, तोपर्यंत कला अकादमीचे लोकार्पण करणार नसल्याचे कला व संस्कृती मंत्री गोविंद गावडे यांनी सांगितले.

ते ‘गोमन्तक टीव्ही’वर संपादक-संचालक राजू नायक यांनी घेतलेल्या विशेष मुलाखतीत बोलत होते.

मागील अनेक वर्षांत कला अकादमीची अनेकदा डागडुजी करण्यात आली तसेच आता पुनर्बांधणीसाठी जेवढा खर्च झाला त्यात नव्याने कला अकादमीची उभारणी झाली असती.

ज्यावेळी मी पुनर्बांधणीबाबत वाच्यता केली त्यावेळी अनेकांनी मला विरोध केला. अनेकांच्या टिकेला मला सामोरे जावे लागल्याचे गावडे यांनी सांगितले.

मी कला आणि संस्कृती खात्याचा मंत्री म्हणून अकादमीचा अध्यक्ष या नात्याने चालत असलेल्या कामकाजाची पाहणी केली. कला अकादमीची पुनर्बांधणी तसेच त्यापूर्वीची अकादमीची अवस्था कशी होती याची छायाचित्रे व व्हिडिओदेखील माझ्याकडे आहेत.

माझ्यावर विरोधी राजकीय पक्ष भ्रष्टाचाराचा आरोप करत आहेत. जर या पुनर्बांधणीत माझा सहभागच नाही तर भ्रष्टाचाराचा प्रश्‍नच कसा उपस्थित होतो? पुनर्बांधणीचे काम सार्वजनिक बांधकाम खाते करत आहे. ते त्यांच्या अखत्यारित आहे.

तरीदेखील विरोधी राजकीय पक्ष माझ्यावर टीका करत आहेत. एखादे विधान करताना तारतम्य बाळगणे गरजेचे असल्याचे गावडे यांनी सांगितले.

सखोल चौकशी व्हावी

कला अकादमीच्या खुल्या रंगमंचाचे छत कोसळण्यामागचे कारण काय? याबाबत सखोल चौकशी होणे गरजेचे आहे. तसेच यात दोषी असणाऱ्यांवर कारवाईदेखील व्हावी.

आता जे या इमारतीचे सुरक्षा लेखापरीक्षण होणार आहे ते आयआयटी मद्रास करेल. त्यांच्याकडे ती जबाबदारी सोपवलेली आहे, असे गावडे यांनी सांगितले.