Mhadai Tiger project : सेव्ह म्हादई व व्याघ्र प्रकल्प समर्थन गटाच्या सदस्यांनी आज काणकोण मधील पंचायती व पालिकेला समर्थन देण्यासाठी निवेदन सादर केले.या गटात जनार्दन भंडारी, विकास भगत,राजन घाटे,मारियानो फेर्रांव यांनी सह्यानिशी हे निवेदन दिले.निवेदनात पंचायतीनी ग्रामसभेत व पंचायत मंडळाच्या बैठकीत म्हादई बचाव व व्याघ्रप्रकल्पासंदर्भात ठराव घेऊन तो सरकारला सादर करावा,अशी विनंती केली आहे.

म्हादई नदी राज्याची जीवन दायीनी आहे त्याशिवाय सलीम अली पक्षी अभयारण्य, बोंडला अभयारण्य, म्हादई अभयारण्य व मोले राष्ट्रीय उद्यान हे या नदीच्या अखत्यारीत येतात.कर्नाटकने पाणी वळविल्यास त्याचा अनिष्ट परिणाम येथील जीव सृष्टीवर होणार आहे.

केंद्र सरकारने कर्नाटक सरकारला दिलेला कळसा भंडुरा प्रकल्पाचा डीपीआर त्वरित मागे घेण्यासबंधी व म्हादई अभयारण्य व्याघ्र प्रकल्पासाठी घोषित करण्याची मागणी करणारा ठराव पंचायत व पालिकेने घेऊन तो केंद्र सरकार, पंतप्रधान नरेंद्र मोदी, मुख्यमंत्री डॉ.प्रमोद सावंत,वनखाते, म्हादई बचाव आंदोलनाच्या निमंत्रक निर्मला सावंत,

जलस्त्रोत खाते,पर्यावरण व हवामान बदल खाते यांना पाठवून देण्याची मागणी केली आहे. आज या गटाने सर्वच पंचायतीत जाऊन निवेदन सादर केले काही पंचायतीचे सरपंच अनुपस्थित राहिल्याने गटाच्या सदस्यांनी निवेदन पंचायत सचिवांना सादर केले.