म्हादई नदीवरुन गोवा आणि कर्नाटक राज्यात वाद सुरु असून, कर्नाटक नदीवरील कळसा-भांडुरा प्रकल्प बांधला जाणार आहे. यासाठी हालचाली सुरु असून, नुकतेच राज्याचे मुख्यमंत्री सिद्धरामय्या यांनी पंतप्रधान नरेंद्र मोदी यांची भेट घेतली.

यावरुन विजय सरदेसाई यांनी सरकारवर टीका केली. कर्नाटक सरकार प्रकल्पासाठी प्रयत्न करत असताना गोवा सरकार काहीच करत नसल्याचा आरोप सरदेसाई यांनी केला.

'गोव्याचे भाजप सरकार निर्लज्जपणे खोटे बोलून गोमंतकीयांची फसवणूक करत आहे. म्हादईचा प्रश्न योग्य पद्धतीने पुढे घेऊन जाण्यासाठी कर्नाटक सरकार सर्वोच्च स्तरावर प्रयत्न करत आहे. दुसरीकडे मुख्यमंत्री प्रमोद सावंत यांना पंतप्रधान नरेंद्र मोदींसमोर गोव्याची बाजू मांडण्यासाठी सर्वपक्षीय शिष्टमंडळ देखील उभे करता आले नाही.'

'मागील विधानसभेत मी केलेल्या सातत्यपूर्ण केलेल्या पाठपुराव्यानंतर सभागृह समिती स्थापन करण्यात आली, परंतु गोवा सरकार एवढे नपुंसक किंवा त्यांच्या हँडलर्सच्या अधीन गेले आहे की त्यांना केवळ एकदाच बोलावण्यात आले. म्हादई प्रत्येक गोमंतकीयासाठी पवित्र आहे आणि त्यांना वचन द्या की हे असंवेदनशील सरकार म्हादई विकणार नाही,' असे ट्विट आमदार विजय सरदेसाई यांनी केले आहे.

दरम्यान, कर्नाटकचे मुख्यमंत्री सिद्धरामय्या यांनी पंतप्रधान नरेंद्र मोदी यांची भेट घेऊन विविध मागणी संदर्भात पत्र दिली. यात म्हादईच्या कळसा-भांडुरा प्रकल्पाबाबतच्या पर्यावरणसंबधित मंजुरीचे पत्र देखील देण्यात आले.