पणजी : गोव्यात प्रमोद सावंतांना पुन्हा मुख्यमंत्री होऊ देणार नाही, असं खुलं आव्हान मगोपच्या सुदिन ढवळीकरांनी दिलं आहे. त्यामुळे भाजपसमोर आता आणखी मोठा पेच निर्माण झाला आहे. याआधी आलेल्या एक्झिट पोलमध्ये काँग्रेसला जास्त जागा मिळतील असा अंदाज वर्तवण्यात आला आहे. त्यामुळे मगोपची भूमिका निर्णायक ठरणार आहे.

मगोपच्या (MGP) सुदिन ढवळीकरांनी काँग्रेसचे ज्येष्ठ नेते पी चिदंबरम यांची भेट घेतल्याचीही माहिती आहे. महाराष्ट्रवादी गोमन्तक पक्षाची तृणमूल काँग्रेससोबत युती आहे. त्यामुळे साहजिकच भाजपशी मगो-तृणमूलची युती हातमिळवणी करणं कठीण आहे. मात्र आता पहिल्यांदाच सुदिन ढवळीकरांनी प्रमोद सावंतांना मुख्यमंत्री होऊ न देण्याचं आव्हान दिल्याने भाजपच्या गोटात चिंतेचं वातावरण पाहायला मिळतं आहे.

दरम्यान काँग्रेसच्या (Congress) नेत्यांकडून सातत्याने सुदिन ढवळीकरांशी बोलणी सुरु आहेत. काँग्रेस नेते आणि कळंगुटमधील काँग्रेसचे उमेदवार मायकल लोबो यांनी सुदिन ढवळीकरांना सोबत घेऊन सरकार स्थापन करणार असल्याचा दावा केला आहे. तसंच भाजपने लाथाडल्यामुळे मगोप भाजपसोबत (BJP) जाणार नाही, असा विश्वासही त्यांनी यापूर्वीच व्यक्त केला आहे. निकाल जाहीर झाल्यानंतर मगो-तृणमूलचे नेते बैठक घेणार असून कुणाला पाठिंबा द्यायचा याचा निर्णय घेतला जाईल, असं सुदिन ढवळीकरांनी स्पष्ट केलं आहे.