MGP Leader Rohan Harmalkar Arrested

बार्देश: गोवा सोड अन्यथा जीवे मारु अशी धमकी देऊन मारहाण केल्या महाराष्ट्र गोमंतकवादी पक्षाचे नेते रोहन हरमलकर आणि दुर्गादास मोरजकर यांना हणजूण पोलिसांनी अटक केलीय. रोहन आणि दुर्गादास यांच्याविरोधात दहा ते बारा इतर व्यक्तींसोबत मिळून एका अनोळखी व्यक्तीला धमकी देऊन मारहाण केल्याचा आरोप आहे. सोमवारी (२५ नोव्हेंबर) रोजी हडफडे येथे ही घटना उघडकीस आली.

सुरेंद्र भरत सिंह कुमार (वय ५१, रा. हिस्सार, हरियाणा) यांनी हणजूण पोलिसांकडे तक्रार दाखल केली आहे.

प्राप्त तक्रारीवरुन पोलिसांनी रोहन हरमलकर आणि दुर्गादास मोरजकर आणि इतर व्यक्तीविरोधात भारतीय न्याय संहिता कलम 89(2), 191(2), 118, 352, 351(2) अंतर्गत गुन्हा नोंद करण्यात आला आहे. पैकी हरमलकर आणि मोरजकर यांना अटक करण्यात आली आहे.

पोलिसांनी दिलेल्या माहितीनुसार, रोहन हरमलकर आणि दुर्गादास मोरजकर यांनी अन्य दहा व्यक्तींसोबत मिळून सुरेंद्र भरत सिंह कुमार याना धमकी देत कानशिलात लगावली तसेच, लाथा बुक्यांनी मारहाण केली. तसेच, गोवा सोड अन्यथा जीवे मारु अशी धमकी दिली.

सुरेंद्र भरत सिंह कुमार यांनी याप्रकरणी पोलिसांत तक्रार दाखल केली. तक्रारीवरुन पोलिसांनी हरमलकर आणि मोरजकर यांना अटक केली आहे. हणजूण पोलिस अधिक तपास करत आहेत.