पणजी : हळूहळू राज्यात तापमानाचा पारा वाढत चालला आहे. आज बुधवारी पणजीत (Panaji) कमाल 32 अंश तर किमान 21 अंश सेल्‍सियस तापमानाची नोंद झाली. 28 फेब्रुवारीपर्यंत तापमान 32 अंशांपर्यंतच राहील व 1 मार्चनंतर ते एक ते दोन अंशांनी वाढेल असा अंदाज पणजी वेधशाळेने व्‍यक्त केला आहे.

आज राज्यात सर्वाधिक कमाल तापमानाची (temperature) नोंद पणजीत 32 अंश तर सर्वांत कमी तापमान दाबोळी 20 .7 डिग्री सेल्‍सियस एवढे नोंद झाले. थंडी हळूहळू कमी होत असून तापमान वाढू लागले आहे. राज्‍याच्‍या काही भागांमध्ये सकाळी कडक ऊन आणि रात्रीची थंडी पडते. त्‍यामुळे आरोग्याच्या समस्या उद्‌भवू लागल्‍या आहेत. आता शाळाही सुरू झाल्यामुळे मुलांना कडक उन्हाचा सामना करावा लागू शकतो. थंड पेय, शहाळे, विविध फळांचे ज्‍युस, लस्सी आदी पेयांकडे लोक वळू लागले आहेत.