Goa Crime : ओयतियान-ताळगाव येथे आपल्याच पोटच्या पाच वर्षाच्या चिमुकल्याचा आईने दोरीच्या साहाय्याने गळा आवळून खून केल्याची धक्कादायक घटना समोर आली आहे. या प्रकरणी पोलिसांनी सुनीता राणी (वय-25, रा.मुळ नेपाळ) हिला अटक केली आहे. या प्रकरणात तिच्या मित्राचाही पोलिस शोध घेत आहेत.

सुनिताचा पती रेशम डांगी हा तिच्यासोबत राहात नाही. आपला पाच वर्षीय मुलगा आजारी होता आणि शनिवारी (29 ऑक्टोबर) अचानक त्याचा मृत्यू झाला, असे असा कांगावा करून तिने त्याच्या अंत्यविधीची तयारी सुरू केली होती. याची कुणकूण पोलिसांना लागताच त्यांनी मृतदेह ताब्यात घेतला. शवचिकित्सा अहवाल आल्यावर त्या मुलाचा दोरीने गळा आवळून खून झाल्याचे स्पष्ट झाले.

कारण गुलदस्त्यात

सुनिताचा एक मित्र असून पोलिस त्याच्या शोधात आहेत. मात्र, मुलाचा तिने खून का केला हे तिने अजून सांगितलेले नाही.ही महिला मूळ दान नेपाळ येथील रहिवासी असून तिच्या कुटुंबियांना संपर्क केल्याची माहिती पोलिसांनी दिली. तिची मानसिक स्थिती ठिक नसल्याने तिला मनोरुग्ण इस्पितळात नेले जाणार आहे.