Mega Housing Project :

कुठ्ठाळी, सांकवाळ पंचायत क्षेत्रातील सावरफोंड येथे होऊ घातलेल्‍या मेगा हाऊसिंग प्रकल्पाला आज सकाळी पंचायत मंडळाच्या बैठकीत अधिकृत मान्‍यता देण्‍यात येणार होती.

परंतु सरपंच रोहिणी तोरस्कर, उपसरपंच गिरीश पिल्ले व पंचायत सचिव वालीस हे दोनदा उठून गेल्याने बैठक पूर्ण होऊ शकली नाही. त्‍यामुळे प्रकल्‍पाला मंजुरी मिळू शकलेली नाही. यावेळी सत्ताधारी पंच, विरोधातील पंच व ग्रामस्थांमध्ये शाब्‍दिक बाचाबाची झाली.

बैठक सुरू होताच सुकोरीना वालीस व विरोधी गटातील पंच मावरेलियो कार्वालो यांच्यात शाब्दिक वाद सुरू झाले. हेच निमित्त पुढे करून सरपंच व उपसपंच हे सचिवांसह उठून गेले. परंतु, उपस्थितांनी गोंधळ माजवल्याने तसेच बैठक सुरू करण्याचा आग्रह धरल्याने ते परत आसनस्थ झाले.

यावेळी उपसरपंच गिरीश पिल्ले म्हणाले, आम्ही नाहक अपमान सहन करणार नाही. विरोधी गटातील पंच तुळशीदास नाईक म्हणाले, पंचायत सचिव बैठकीची नोंदवही घेऊन बाहेर जाऊ शकत नाहीत. यावेळी प्रश्‍‍नांची सरबत्ती झाली.

दरम्‍यान, कोणत्‍याही परिस्‍थितीत मेगा प्रकल्‍प होऊ द्यायचा नाही, असा ग्रामस्‍थांनी पवित्रा घेतला. या संदर्भात पुढील दिवसांत दिशा ठरवली जाईल.