डिचोली: मये परिसरात मोकाट गुरांची समस्या दिवसेंदिवस गंभीर बनत असून रस्त्यावर ठाण मांडणाऱ्या मोकाट गुरांमुळे अपघातांचा धोका वाढला आहे. गेल्या तीन ते चार वर्षांत मयेत दाम्पत्यासह तिघांवर गुरांनी हल्ला करण्याच्या घटना घडल्या आहेत. ही समस्या पंचायतीने त्वरित सोडवावी, अशी मागणी ग्रामस्थांतर्फे करण्यात येत आहे.

रस्त्यावरील मोकाट गुरांविरोधात मोहीम हाती घेण्याचा निर्णय मये पंचायतीने घेतला असला, तरी अद्याप प्रत्यक्ष कारवाई सुरू झालेली नाही. मोकाट गुरांविरोधात कारवाई कधी? असा प्रश्न वाहनचालकांसह नागरिक व्यक्त करीत आहेत. गेल्यावर्षी झालेल्या मये पंचायतीच्या ग्रामसभेत मोकाट गुरांचा मुद्दा चर्चेत आला होता.

त्यावेळी शेतकऱ्यांनी गुरे रस्त्यावर सोडल्यास या मोकाट गुरांविरोधात कारवाई करण्यात येणार असल्याचे तत्कालीन सरपंच सीमा आरोंदेकर यांनी स्पष्ट केले होते. मात्र सहा महिने उलटलेत, तरी अद्याप कारवाई सुरू झालेली नाही की ही समस्या सुटलेली नाही.

मये भागात मोकाट गुरांची समस्या दिवसेंदिवस गंभीर बनत चालली आहे. केळबायवाडा ते हळदणवाडीपर्यंतच्या रस्त्यावर तर मोकाट गुरे सदैव रस्त्यावर संचार करताना आढळून येतात. गुरांमुळे वाहतुकीस अडथळा निर्माण होत आहे.

बऱ्याचदा ही गुरे रस्त्यावर ठाण मांडलेली आढळून येतात. रात्रीच्यावेळी तर रस्त्यावरील या गुरांचा अंदाज येत नसल्याने वाहनचालकांचा गोंधळ उडतो. वाहने हाकताना वाहनचालकांना तर अक्षरशः कसरत करावी लागते. गुरांमुळे अपघातांनाही निमंत्रण ठरत आहे. गुरांमुळे लहानसहान अपघातही घडत असतात.

गुरांकडून हल्ला

रस्त्यावरील गुरांकडून हल्ला करण्याचे प्रकारही घडत आहेत. केळबायवाडा येथे गुरांनी केलेल्या हल्ल्यात दुचाकीवरील दाम्पत्य जखमी झाले होते. शिरोडकर दाम्पत्य स्कुटरवरुन डिचोलीच्या दिशेने जात होते. केळबायवाडा येथे चढणीवर पोचताच रस्त्यावरील गुरांनी स्कुटरला धडक दिली. त्यात शिरोडकर नवरा-बायको स्कूटरसह रस्त्यावर पडून जखमी झाले होते.

तर तीन वर्षांपूर्वी केळबायवाडा येथे गुरांनी केलेल्या हल्ल्यात तेथीलच एका हॉटेलमालकाचे दोन्ही हातांना दुखापत झाली आहे. आणखीनही काहीजण जखमी झाल्याची माहिती मिळाली आहे. मोठा अनर्थ घडण्यापूर्वीच या गुरांचा बंदोबस्त करावा, अशी मागणी वाहनचालकांसह ग्रामस्थ करीत आहेत.