Goa Congress: मडगावचा मास्टर प्लॅन तयार करण्याची जबाबदारी पंचवीसही प्रभागांतील नगरसेवकांवर आहे. सध्‍या ‘जी-सुडा’तर्फे मास्टर प्लॅन तयार करण्यात आलाय, त्यास काहीच अर्थ नाही, अशी टीका काँग्रेसचे एल्विस गोम्स यांनी केली.

मडगावात पत्रकारांशी बोलताना काँग्रेसचे एल्विस म्‍हणाले की, प्रत्येक नगरसेवकाने आपापल्या प्रभागाचा अभ्यास करणे गरजेचे आहे. प्रभागामधील रस्ते, सिवरेज पद्धत, वाहतूक, पाणी व वीजपुरवठ्याची स्‍थिती आदींचा अभ्यास करून त्यात काय त्रुटी आहेत, काय सुधारणा हवी याचा अहवाल बनवून तो सादर करायचा असतो.

सर्वांचे अहवाल एकत्र करून नंतरच मास्टर प्लॅन तयार करावयाचा असतो. येथे तर मास्टर प्लॅन काय हे नगरसेवकांनाच माहीत नाही. रिजनल प्लॅन, झोनिंग प्लॅन, मडगावसाठी ओडीपी असताना मास्टर प्लॅनची गरजच काय? असा सवाल एल्विस गोम्स यांनी उपस्थित केला.

जो मास्टर प्लॅन तयार केलाय असे जे सांगण्यात येते त्यामागे मोठे षडयंत्र आहे. मडगावमधील लोकसंख्या वाढविण्याचा हा डाव आहे. मास्टर प्लॅनबद्दलची माहिती शहरातील सामान्य नागरिकांना कळली पाहिजे.

शहरात कित्येक तज्‍ज्ञ आहेत. त्यांच्याकडून सूचना ऐकून घेतल्या पाहिजेत. मास्टर प्लॅन तयार करण्यास ‘जी-सुडा’ कोण? ती केवळ एक संस्था आहे. खरे घटनात्मक अधिकार नगरपालिकेला किंवा पंचायतीला असतात. नगरसेवकांना, पंचांना काहीच महत्व दिले जात नाही. नगरसेवक व पंचांना घटनेत मोठे अधिकार दिले गेले आहेत, असेही एल्विस गोम्स यांनी सांगितले.