सासष्टी : मडगाव रवींद्र भवनातील ‘पाय तियात्रिस्‍त’ हे मुख्य सभागृह आणि ब्लॅक बॉक्स थिएटर सुमारे सहा महिन्यांच्या दुरुस्ती तसेच नूतनीकरणानंतर पुन्हा लोकांच्या सेवेसाठी खुले झाले. मुख्यमंत्री डॉ. प्रमोद सावंत यांच्या हस्ते या सभागृहांचे लोकार्पण करण्यात आले.

यावेळी आमदार तथा सार्वजनिक बांधकाममंत्री दिगंबर कामत, कला-संस्कृतीमंत्री रमेश तवडकर, कुडतरीचे आमदार आलेक्स रेजिनाल्ड लॉरेन्स, नावेलीचे आमदार उल्हास तुयेकर, रवींद्र भवनाचे अध्यक्ष राजेंद्र तालक, उपाध्यक्ष मनोहर बोरकर आदी मान्‍यवर उपस्थित होते.

मुख्यमंत्री म्‍हणाले, या सभागृहांच्या दुरुस्तीसाठी एकूण सव्वादोन कोटी रुपये खर्च करण्यात आले असून काम विक्रमी वेळेत पूर्ण करण्यात आले आहे.या कामावर सार्वजनिक बांधकाममंत्री दिगंबर कामत आणि कला-संस्कृतीमंत्री रमेश तवडकर यांनी प्रत्यक्ष देखरेख केली असेही त्यांनी नमूद केले.

दरम्‍यान, संध्याकाळी मडगाव, फातोर्डा, नावेली परिसरातील सांस्कृतिक व कला क्षेत्रातील संस्थांची माहिती देणाऱ्या पुस्तिकेचे प्रकाशन करण्यात आले. या परिसरात २० संस्था, ८१ प्रशिक्षकांमार्फत तब्बल २८३९ विद्यार्थी कलेच्या विविध क्षेत्रांमध्ये प्रशिक्षण घेत आहेत, अशी माहिती यावेळी देण्यात आली.

‘आनंदमठ’ नाटकाने सोहळ्याची सांगता

कार्यक्रमाच्या अखेरीस पुण्याच्या कोलाज क्रिएशन्स निर्मित ‘आनंदमठ’ या संगीत नाटकाचे सादरीकरण करण्यात आले. हे नाटक बंकिमचंद्र चट्टोपाध्याय यांच्या अजरामर कादंबरीवर आधारित आहे. संन्यस्त योद्ध्यांच्या स्वातंत्र्यलढ्यावरील त्याग आणि प्रेरणा यांचे भावपूर्ण चित्रण यात करण्यात आले.

मडगाव रवींद्र भवनाचा उपयोग कला, संस्कृतीचे जतन आणि कलाकारांच्या सर्वांगीण विकासासाठी केला जाईल. तसेच यंदाच्या इफ्फीतील काही चित्रपट येथे प्रदर्शित करण्याबाबत सरकार विचार करत आहे. - डॉ. प्रमोद सावंत, मुख्‍यमंत्री