मडगाव: मडगाव पोलीस काेठडीत बंदिस्‍त असताना पोलिसांकडून मारहाण झालेल्‍या एडबर्ग परेरा यांची प्रकृती पुन्‍हा बिघडल्याने त्यांना सकाळी ‘आयसीयू’त दाखल करण्‍यात आले. सकाळी त्यांना श्वसनाचा त्रास सुरु झाला होता. या प्रकरणाचा पाठपुरावा करणाऱ्या सामाजिक कार्यकर्त्या प्रतिमा कुतिन्‍हो आणि सामाजिक कार्यकर्ते अँथनी डिसिल्‍वा या दाेघांनी गोवा वैद्यकीय महाविद्यालय इस्‍पितळात परेरा याच्‍या प्रकृतीबाबत विचारपूस केली.

कुतिन्‍हो यांनी पत्रकारांना सांगितले, की एडबर्गला पुन्हा एकदा अतिदक्षता विभागात हलविण्‍यात आले आहे. त्यांच्या डोक्‍याला जबर मार लागल्‍याने शस्‍त्रक्रिया करण्‍यात आली होती. त्‍यानंतर त्‍याला व्हेंटीलेटरवर ठेवण्‍यात आले होते.

काल त्‍यांची प्रकृती काही प्रमाणात स्‍थिरस्‍थावर झाल्‍यामुळे त्‍यांना वेन्‍टीलेटरवरुन काढून जनरल वॉर्डमध्‍ये शिफ्‍ट करण्‍यात आले होते. मात्र सकाळी पुन्‍हा त्रास सुरु झाल्‍याने त्‍यांना अतिदक्षता विभागात हलविण्‍यात आले.

दरम्यान, या मारहाण प्रकरणात मडगावचे पोलीस उपनिरीक्षक निलेश शिरवईकर याच्‍या विरोधात गुन्‍हा नोंदवण्यात आला असून सध्‍या त्‍यांना निलंबित करण्‍यात आले आहे. सेवेतून निलंबित करावे आणि उपनिरीक्षक शिरवईकर यांच्‍या विरोधात खूनाचा प्रयत्‍न केल्‍याचा गुन्‍हा नोंद करावा, अशी मागणी सामाजिक कार्यकर्ते अँथनी डिसिल्‍वा यांनी केली आहे.

प्रकरण क्राइम ब्रँचकडे सुपूर्द

एडबर्ग परेरा हे सध्या गोमेकॉत प्राणाशी झुंजत असताना या प्रकरणाचे गांभीर्य ओळखून हे प्रकरण आता तपासासाठी क्राइम ब्रँचकडे सुपूर्द करण्यात आल्याची माहिती पोलिसांनी दिली. या प्रकरणी मडगाव पोलीस स्थानकातील उप निरीक्षक निलेश शिरवईकर याला निलंबित करण्यात आले असून त्याच्या विरोधात गंभीर मारहाणीचा गुन्हा नोंद करण्यात आला आहे.