शिरवडे मडगाव येथे उघड्यावर टाकून दिलेल्या अर्भकाच्या आईचा पत्ता पोलिसांना मिळाला असून एका 17 वर्षीय अल्पवयीन मुलीवर मातृत्व लादण्याच्या घटनेतून त्या मुलीचा जन्म झाल्याचे उघड झाले आहे.

मडगाव पोलिसांनी (Margao Police) या प्रकरणी त्या मुलीवर मातृत्व लादनाऱ्या त्या इसमाला ताब्यात घेतले असून त्याला बलात्काराच्या आरोपाखली अटक होण्याची शक्यता आहे.

गुरूवारी (दि.08) सकाळी शिरवडे मडगाव येथे असलेल्या सांडपाणी प्रक्रिया प्रकल्प परिसरात टाकून दिलेली एक नवजात मुलगी आढलून आली होती. त्यानंतर पोलिसांनी तपास केल्यावर जवळच्या एका भाड्याच्या घरात राहणाऱ्या एका कुटुंबातील एका अल्पवयीन मुलीने हे अर्भक जन्माला घातल्याचे कळून आले होते.

अधिक चौकशी करता तिच्याच एका नात्यातील मुलाने तिच्यावर बलात्कार केल्याचे उघड झाले होते. त्यातून ती गरोदर राहून मुलीला जन्म दिल्यानंतर तिने त्या मुलीला घरा शेजारीच उघड्यावर टाकून दिले होते. सध्या या प्रकरणात मडगाव पोलीस निरीक्षक तुळशीदास नाईक तपास करीत आहेत.