वास्को, ता. १४ (खास प्रतिनिधी): मुरगाव पालिकेच्या बालोद्यान परिसरात उभारलेले स्ट्रीट फूड स्टॉल्स सुरू करण्यासंबंधी संबंधितांनी हालचाली सुरू केल्या होत्या.

परंतु न्यायालयाच्या आदेशानुसार त्या स्टॉलच्या क्षेत्रफळापैकी ५३ चौरस मीटर भाग न हटवल्याप्रकरणी सामाजिक कार्यकर्ते नझीर खान यांनी कायदेशीर नोटिस पाठविली आहे. त्यामुळे काम बंद करण्यात आले आहे. न्यायालयाचा अवमान केल्याप्रकरणी आपण न्यायालयात जाणार असल्याचे नझीर खान यांनी सांगितले आहे.

केंद्र सरकारच्या योजनेअंतर्गत पालिकेने फूड स्ट्रीट बालोद्यानालगतच्या जागेत उभारण्याचा निर्णय घेतला होता. या जागेत स्थानिक युवक किक्रेट तसेच इतर खेळ खेळतात, त्यामुळे तेथे फूड स्ट्रीट उभारू नये यासाठी सामाजिक कार्यकर्ते नझीर खान न्यायालयात याचिका दाखल केली होती.

सात दिवसांची मुदत

न्यायालयाच्या आदेशानुसार त्या स्टॉल्सच्या एकूण क्षेत्रफळापैकी ५३ चौरस मीटर भागाचे बांधकाम सात दिवसांत मोडा अन्यथा संबंधितांविरोधात न्यायालयाच्या अवमानाची कारवाई करण्यास भाग पाडले जाईल, असे नोटिशीत नमूद करण्यात आले आहे. त्यामुळे संबंधित पुढील कोणती पावले उचलतात याकडे वास्कोवासियांचे लक्ष लागले आहे.