Digambar Kamat: ज्येष्ठ आमदार आणि माजी मुख्यमंत्री दिगंबर कामत यांनी गतवर्षी काँग्रेस सोडल्यानंतर अजब वक्तव्य केले होते. देवाला विचारूनच मी भाजपमध्ये प्रवेश केला आहे, असे ते म्हणाले होते. दरम्यान, नुकतेच आमदार कामत यांना पुन्हा 'देव' आठवला आहे.

पत्रकारांच्या प्रश्नाला उत्तर देताना कामत यांनी पुन्हा देवाची आठवण काढल्याने तिथे हास्याचे फव्वारे उडाले.

दिगंबर कामत यांना मंत्रीपद मिळणार याबाबतच्या चर्चा गेल्या काही महिन्यांपासून गोव्यातील राजकीय वर्तुळात सुरू आहेत. तथापि, त्यावर अद्याप निर्णय झालेला नाही. हाच धागा पकडून कामत यांना पत्रकारांनी छेडले.

पत्रकारांनी कामत यांना तुम्ही मंत्री कधी होणार, असे विचारले. त्यावर कामत म्हणाले की, देवाला विचारा. केवळ तोच या प्रश्नाचे उत्तर देऊ शकतो. त्यांच्या या उत्तरानंतर उपस्थितांना हसु आवरेना. तसेच कामत यांच्या जुन्या वक्तव्यालाही त्यामुळे उजाळा मिळाला.

गेल्या वर्षी सप्टेंबरमध्ये दिगंबर कामत, आलेक्स सिक्वेरा, रूडॉल्फ फर्नांडिस, संकल्प आमोणकर, दिलायला लोबो, मायकल लोबो, राजेश फळदेसाई, केदार नाईक या आठ आमदारांनी काँग्रेस सोडून भाजपममध्ये प्रवेश केला होता.

तेव्हा बोलताना कामत यांनी देवाला विचारूनच मी भाजपमध्ये प्रवेश केला, असे वक्तव्य केले होते. कामत म्हणाले होते की, पितृपक्ष भाद्रपद महिन्यात येतो. भाद्रपद हा अतिशय महत्त्वाचा महिना आहे. याचा विचार करून आणि देवाला विचारूनच मी भाजपात प्रवेश केला आहे.

दरम्यान, या आठ पैकी काही आमदारांना मंत्रीपद देण्यात येईल, असे कबुल करण्यात आल्याचे सांगितले जात होते. पण सात-आठ महिने होत आले तरी कुणालाही मंत्रीमंडळात संधी मिळालेली नाही.

तथापि, दिगंबर कामत, तसेच आमदार आलेक्स सिक्वेरा यांच्या नावाची चर्चा गेल्या काही काळापासून सुरू आहे.