Madgaon Garbage : मडगाव आणि फातोर्डा या दोन्ही मतदारसंघांत कचऱ्याची समस्या दिवसेेंदिवस गंभीर होत चालली आहे. आता मडगाव शहराच्या मध्यवर्ती ठिकाणीसुद्धा कचऱ्याचे मोठमोठे ढीग दिसू लागले असून दुर्गंधीचा त्रास स्थानिक लोकांना होत आहे.

त्याविरुद्ध लोकांनी आवाज उठविण्याचे प्रकारही वाढले आहेत. मडगावच्या केटीसी बस स्टॅण्डलगत माडेल प्रभागात अशाच प्रकारचे कचऱ्याचे ढीग तयार झाले असून त्याविरुद्ध माडेलच्या रहिवाशांनी बुधवारी निदर्शने केली.

मडगावची नगरपालिका कचरा व्यवस्थापनात अपयशी ठरली आहे. केटीसी बस स्टॅण्डजवळच मोठ्या प्रमाणात कचरा टाकण्यात येत आहे. येथे कदंब महामंडळाच्या बसेस थांबत असल्याने त्यांच्या मागे कचऱ्याचे ढीग लागतात. त्यामुळे बसच्या आडून हा कचरा दिसत नाही, असे येथील रहिवासी फेलिक्स रॉड्रिग्स यांनी सांगितले.

आणखी एक रहिवासी मारिया यांनी सांगितले की, या कचऱ्याच्या ढिगाऱ्यांमुळे दुर्गंधीचा त्रास सतावतोच, शिवाय संध्याकाळी डासांचा मोठ्या प्रमाणात प्रादुर्भाव जाणवतो. त्यामुळे मुलांना बाहेर उघड्यावर खेळता येत नाही. डेंग्यू किंवा मलेरियासारखे आजार होण्याची भीती त्यांनी व्यक्त केली.

इथे कचरा टाकण्यास आमचा विरोध असतानाही नगरपालिका प्रशासन येथे कचरा टाकते. आम्ही त्यांना कित्येकदा हा कचरा उचलण्यास सांगितले आहे; पण नगरपालिका काहीच कार्यवाही करत नाही, असा आरोप मिलाग्रीस फर्नांडिस यांनी केला.

...अन्यथा न्यायालयात जाणार

नगरपालिका प्रशासन शहर स्वच्छ करण्यासाठी आहे की घाणेरडे करण्यासाठी, हेच कळत नाही. आम्ही येथील कचरा ताबडतोब उचलण्यासाठी नगरपालिकेला निवेदन देणार आहोत. जर नगरपालिकेने तात्काळ उपाययोजना केली नाही तर मग न्यायालयात धाव घ्यावी लागेल, असे ते म्हणाले.