मडगाव: मडगावातील सराफ स्वप्नील वाळके (३५) यांच्या खून प्रकरणासंबंधी सध्या कोठडीत असलेला एव्हेडर रॉड्रिग्स याच्या जामीन अर्जावर निर्णय देण्यापूर्वी मडगावचे सत्र न्यायालय या खून प्रकरणासंबंधी सीसीटीव्ही फुटेज पाहणार आहे. शुक्रवारी मडगावच्या सत्र न्यायालयात या खटल्यासंबंधी सुनावणी सुरू असताना दक्षिण गोव्‍याच्‍या प्रधान सत्र न्यायाधीश शेरीन पॉल यांच्या न्यायालयाने ही सूचना केली.

या प्रकरणातील संशयित एव्हेडर रॉड्रिग्स याने आपल्याला जामिनावर सोडावे यासाठी सत्र न्यायालयाकडे अर्ज केलेला आहे. आपल्याला या प्रकरणासंबंधी सीसीटीव्ही फुटेज पाहायचे असून त्यासाठी एव्हेंडर रोड्रिग्स याला पुढील सुनावणीच्यावेळी न्यायालयात प्रत्यक्ष हजर करावे, असे निर्देश न्यायालयाने तुरुंग अधिकाऱ्यांना दिले.

ओंकार पाटील, मुश्ताफा शेख, एव्हेडर रॉड्रिग्स, राहुल कुमार, सनी कुमार आणि कुंदन कुमार हे या खून प्रकरणातील सहा संशयित आहेत. कटकारस्थान रचून खून करणे, पुरावा नष्ट करण्याचा प्रयत्न करणे तसेच शस्त्रास्त्र कायद्याच्या विविध कलमांखाली त्यांच्याविरुद्ध आरोप ठेवलेले आहेत.

संशयित राहुल कुमार, सनी कुमार आणि कुंदन कुमार यांनी स्वप्नील याचा खून करण्यासाठी पिस्तुलाची व्यवस्था केली होती, असा आरोप आहे. मडगाव पोलिस स्थानकाचे तत्कालीन पोलिस निरीक्षक सी.एल. पाटील यांच्या नेतृत्वाखालील पोलिस पथकाने या खून प्रकरणाचा तपास केला होता.