आगोंद: चावडी येथील गायतोंडे मैदानावर स्वागत यात्रा, गुढी उभारून, सूर्याची ओवाळणी, पंचांग वाचन आणि प्रसाद वितरण करून हिंदू नववर्षाचे स्वागत करण्यात आले. याशिवाय पैंगीण व गावडोंगरी येथेही कार्यक्रम झाले.

पहाटे मारुती मंदिर चावडी येथून वाहन फेरीला सुरुवात झाली. नगरपालिका भागातून फिरून वाहन फेरीची समाप्ती गायतोंडे मैदानावर झाल्यानंतर जाहीर कार्यक्रमाला सुरुवात झाली. यावेळी सभापती रमेश तवडकर, समाजिक कार्यकर्ते रंगनाथ कोमरपंत, गोपाळकृष्ण कोमरपंत, सतीश वेर्णेकर, दिलखुश शेट, राजू राणे, पंकज नाईक गावकर आदींच्या हस्ते पटांगणावर गुढी उभारण्यात आली.

त्यानंतर सुवासिनींकडून सूर्य ओवाळणी झाली. चिन्मय आमशेकर व सर्वेश हेगडे यांनी पंचांग वाचन केले. प्रतीश प्रभुदेसाई यांनी आभार मानले. प्रसाद वितरणाने कार्यक्रमाची समाप्ती झाली. दरम्यान, पैंगीण येथे नववर्षदिनानिमित्त श्रद्धानंद विद्यालयाजवळील पटांगणात सामूहिक गुढीपूजन, सुवासिनींकडून सूर्याला ओवाळणी, पंचांग वाचन व श्रवण, प्रसाद वितरण आणि एकमेकांना नववर्षदिनाच्या शुभेच्छा देऊन गुढीपाडवा उत्साहात साजरा करण्यात आला. नववर्ष स्वागत समितीचे निमंत्रक काशिनाथ वझे व उमेश प्रभुदेसाई बोरूसकर यांच्या नेतृत्वाखाली हा कार्यक्रम झाला.

गावडोंगरी येथेही कार्यक्रमाचे आयोजन करण्यात आले होते. येथील सरकारी माध्यमिक विद्यालयापासून 14 वयोगटातील 100 मुलांची ढोल ताशांच्या गजरात मल्लिकार्जुन देवालय गावडोंगरी येथपर्यंत मिरवणूक काढण्यात आली. त्यानंतर पंचांग वाचन करण्यात आले.