पणजी: मागील पाच वर्षांत राज्यातील मराठी आणि कोकणी भाषेतील ६१ सरकारी प्राथमिक शाळा बंद पडल्या असून जर या शाळांना आवश्‍यक असणारी पटसंख्या मिळाली तर त्या पुन्हा सुरू करण्याचे आश्‍वासन मुख्यमंत्री डॉ. प्रमोद सावंत यांनी आमदार एल्टन डिकॉस्टा यांनी विचारलेल्या अतारांकित प्रश्‍नाला दिलेल्या उत्तरात म्हटले आहे.

पालकांनी आपल्या मुलांना सरकारी प्राथमिक शाळेत पाठवावे यासाठी सरकार कोणते प्रयत्न करत आहे, असा प्रश्‍नही डिकॉस्टा यांनी विचारला असता उत्तरात म्हटले आहे की, सरकारी शाळांमध्ये अतिशय उत्तम गुणवत्ता असलेले शिक्षक कार्यरत आहेत. त्यामुळे सरकारी शाळेतील शिक्षणाची गुणवत्ता चांगली आहे.

सरकारी शाळांच्या साधनसुविधांमध्ये देखील चांगली सुधारणा करण्यात आली आहे. त्यासोबत मुलांना माध्यान्ह आहार (पीएम-पोशण), मोफत पाठ्यपुस्तके, वह्या, शालेय गणवेश तसेच रेनकोट आदी मोफत पुरविण्यात येतात. योग शिक्षण, मूल्य शिक्षण, गोवा शिक्षण विकास मंडळाद्वारे नागरी सहभाग वाढविणे आदींवर मोठ्या प्रमाणात भर देण्यात येत असल्याचे म्हटले आहे.