Mapusa Market: म्हापसा येथील मार्केटमध्ये भूमिगत वीज वाहिन्यांचे फीडर पिलर उभारणी तसेच वीज पुरवठा वितरण युनिटचे काम सुरू आहे. मात्र, गटारांवर उभारलेल्या फीडरच्या सिमेंट खांबला व्यापारीवर्गाने आक्षेप घेतला आहे. यामुळे पावसाळ्यात बाजारपेठेत पूरसदृश स्थिती उद्भवेल, अशी भीती व्यक्त केली होती.

मंगळवारी वीज खाते, पालिका व म्हापसा व्यापारी संघटनेच्या सदस्यांनी मार्केटमध्ये संयुक्त पाहणी केली व फीडरच्या जागेत बदल करण्याचा निर्णय घेतला. मार्केटमध्ये जवळपास ६२ फिडर पिलर उभारले जाणार आहेत. यावेळी वीज अभियंता सावियो फर्नांडिस, पालिका अभियंता प्रशांत नागवेकर आदी उपस्थित होते.

कंपनीची सारवासारव

वीज खात्याने म्हापसा शहरात स्वस्तिक इन्फ्रा प्रा.लि. (एआयपीएल) या कंत्राटदार कंपनीतर्फे भूमिगत वीज वाहिन्यांद्वारे वीज पुरवठा देण्याचे काम सोपविले आहे. मध्यंतरी, संयुक्त पाहणी करून हे युनिट व फीडर पिलर उभारण्याची जागा निश्चित केली होती.

तेव्हा गटारांवर युनिट न बसविण्याची सूचना व्यापाऱ्यांनी केली होती. तरीही कंपनीने पिलरसाठी गटारांवर सिमेंट खांब उभारले. याविषयी संबंधितांकडून जागेचा अभाव सांगत कृतीचे समर्थन करण्याचा प्रयत्न केला. मात्र, वाढता आक्षेप व स्थिती पाहून बहुतांश युनिट तसेच फीडर पिलरची जागा बदलण्याचा निर्णय घेतला आहे.