Mapusa Water Supply Shortage: म्हापशातील अल्तिनो फेरा या भागात वॉर्ड क्रमांक 11 मध्ये गेल्या 8 ते 10 दिवसांपासून पिण्याचे पाणीच येत नाही. पाणी पुरवठा होत नसल्याने येथील नागरिकांची गैरसोय होत होती.

आज बुधवारी येथील नागरिकांचा संताप उफाळून आला. येथील महिलांनी अचानक केलेल्या रास्तारोकोमुळे येथे तणावाचे वातावरण निर्माण झाले होते.

प्रभाग क्रमांक 11 मध्ये गेल्या 8 ते 10 दिवसांपासून पिण्याचे पाणी येत नाही. जवळपास 35 ते 40 घरांना याचा फटका बसत आहे. त्यामुळे हे सर्व नागरिक वैतागले आहेत. बुधवारी, येथील महिलांनी अचानक पिण्याच्या पाण्यासाठीची भांडी, घागरी, बादली यांच्यासह रास्ता रोको केला.

लहान मुलींपासून ते वृद्ध महिलांपर्यंत या आंदोलनात सहभागी झाले होते. महिलांनी अचानक घेतलेल्या या उग्र पवित्र्यामुळे येथे काही काळ वातावरण तणावपूर्ण बनले होते. या रास्ता रोकोमुळे येथील वाहतूक काही काळ विस्कळीत झाली होती.