म्हापसा : पर्यटनमंत्री तथा पर्वरीचे आमदार रोहन खंवटे यांच्यासह साळगावचे आमदार केदार नाईक, जलस्त्रोत अधिकारी व सार्वजनिक बांधकाम विभागाच्या अधिकाऱ्यांनी मंगळवारी धुळेर-म्हापसा येथे जलवाहिनी टाकण्याच्या सुरू असलेल्या तसेच येत्या दहा दिवसांत हे काम पूर्ण करण्याचे निर्देश जलस्त्रोत अधिकाऱ्यांना दिले. जेणेकरून कच्च्या पाण्याचा पुरवठा पर्वरी जलशुद्धीकरण प्रकल्पास तातडीने केला जाऊ शकतो.

यासंदर्भात मंत्री खंवटे यांनी पाणीटंचाईचा मुद्दा जलस्त्रोतमंत्री सुभाष शिरोडकर यांच्याकडे मांडला असून अस्नोडा जलशुद्धीकरण प्रक्रिया प्रकल्पास कच्चा पाणीपुरवठा वाढवण्यास सांगितले आहे. तसेच सार्वजनिक बांधकाममंत्री नीलेश काब्राल यांच्याकडे पर्वरी व साळगाव मतदारसंघाला प्रक्रिया केलेले पाणीपुरवठा वितरणाबाबतचा विषय उपस्थित केला.

मंगळवारी, सायंकाळी मंत्री खंवटे यांच्यासह साळगावचे आमदार केदार नाईक यांच्यासमवेत जलस्त्रोत विभागाचे मुख्य अभियंता प्रमोद बदामी व इतर अधिकाऱ्यांच्या उपस्थितीत पंचायत सदस्यांनी धुळेरला भेट दिली. जिथे सध्या तिलारी पाण्याची पाईपलाईन टाकण्याचे काम सुरु आहे. जी ग्रीन पार्क पंपिंग स्टेशनला जोडली जाईल व पुढे पर्वरी ट्रीटमेंट प्लांटला कच्चा (रॉ) पाणीपुरवठा करेल. यावेळी मंत्री, आमदारांनी संबंधितांना काम लवकर पूर्ण करण्याच्या सूचना केल्या.

प्रसारमाध्यमांशी संवाद साधताना पर्यटनमंत्री रोहन खंवटे म्हणाले की, पर्वरी व साळगाव येथे पाण्याची मोठी समस्या आहे. अस्नोडा प्रक्रिया प्रकल्पात १६० एलएलडी पाण्याची क्षमता आहे, परंतु आम्हाला १२० एमएलडी प्रक्रिया केलेले पाणी मिळते.

दोन दिवसांत सुरळीत पाणीपुरवठा

सार्वजनिक बांधकाम खात्यात समन्वयचा अभाव असल्याची माहिती मला मंत्र्यांकडूनच मिळाली. सार्वजनिक बांधकाम मंत्र्यांनी पाण्याच्या टँकर सेवेवर सध्या भर दिला आहे आणि आम्ही अस्नोडा जलशुद्धीकरण प्रकल्पामधून येणाऱ्या पाण्याचे योग्य वितरण करण्यास सांगितले आहे. प्रक्रिया केलेले पाणी सोडल्यानंतर दोन दिवसांत पाणीपुरवठा सुरळीत होईल, अशी अपेक्षा असल्याचे खंवटे म्हणाले.