म्हापसा : आगामी पालिका निवडणूक डोळ्यांसमोर ठेवत पुन्हा एकदा सत्ताधाऱ्यांकडून येथील पोर्तुगीजकालीन म्हापसा मार्केटचा पुनर्विकास प्रकल्प चालीस लावण्याची योजना आहे.

या पार्श्वभूमीवर म्हापसा मार्केट असोसिएशनच्या पदाधिकाऱ्यांसोबत उपसभापती तथा स्थानिक आमदार जोशुआ डिसोझा यांच्या अध्यधक्षतेखाली ही बैठक घेण्यात आली. तीन टप्प्यांत हा प्रकल्प पुढे नेण्यात येणार असून, मार्केट इमारतीच्या पुनर्विकासाचे काम गोवा राज्य नागरी विकास एजन्सीतर्फे हाती घेण्याची योजना आहे. यासाठी २० कोटी रुपये खर्च अपेक्षित आहे.

यावेळी व्यापाऱ्यांना मार्केटच्या पुनर्विकास प्रकल्प आराखड्याची पॉवर प्रेझेंटेशनद्वारे माहिती देण्यात आली. त्यानुसार, मार्केट असोसिएशनच्या पदाधिकाऱ्यांनी आराखड्याला सकारात्मक प्रतिसाद दिला असून, हा कृती आराखडा मार्केट असोसिएशनच्या बैठकीसमोर मांडला जाईल. त्यानंतर व्यापाऱ्यांच्या हरकती व इतर सूचनांनुसार या आराखड्याबाबत अंतिम निर्णय घेतला जाईल.

आजच्या बैठकीत नगराध्यक्षा प्रिया मिशाळ, उपनगराध्यक्ष प्रकाश भिवशेट, मुख्याधिकारी चंद्रकांत शेटकर, वास्तुविशारद अश्विनीकुमार प्रभू, व्यापारी संघटनेचे अध्यक्ष जितेंद्र फळारी, सचिव सिद्धेश राऊत व पदाधिकारी, अखिल गोवा व्यापारी महासंघाचे अध्यक्ष नारायण कारेकर आणि पदाधिकारी, भाजप मंडळाध्यक्ष योगेश खेडेकर, म्हापसा बेकर्स, म्हापसा फुल मार्केट, अखिल गोवा एफएमसीजी, टेलिकॉम वितरक असोसिएशन या संघटनांचे पदाधिकारी, नगरसेवक, पालिका अभियंता, पालिका निरीक्षक व ‘जीसुडा’चे अधिकारी उपस्थित होते.

शकुंतला पुतळा परिसराचे सुशोभीकरण

उपसभापती जोशुआ यांनी सांगितले की, २० कोटी रुपये खर्चाचा हा प्रकल्प आहे. पोर्तुगीजकालीन इमारतीला लागलेली गळती रोखण्यासाठी इमारतीच्या छतावर पत्र्यांचे छप्पर घालणे, सध्या व्यापारी वर्गाने आपल्याला हवे त्या क्षमतेने छप्पर घातले आहे.

ते हटवून एका समान छप्पराचे आवरण उभारले जाईल. तसेच इमारतीची डागडुजी करणे, शकुंतला पुतळा परिसराचे सुशोभीकरण, अशी ही योजना आहे.