Mapusa News :

म्हापसा, स्व. दत्ताराम पालयेकर चॅरिटेबल ट्रस्ट प्रस्तुत तसेच कला-संस्कृती संचालनायल यांच्या सहकार्याने पंधरावे ‘स्वर अभिषेकी’ अर्थात भावभक्ती संगीत संमेलन दि. २४ व २५ फेब्रुवारी असे दोन दिवस येथील श्री हनुमान नाट्यगृहात आयोजित केल्याची माहिती माजी आमदार तथा प्रमुख ट्रस्टी विनोद पालेयकर यांनी पत्रकार परिषदेत दिली.

ट्रस्‍टतर्फे संगीत अकादमी उभारण्याचा प्रयत्‍न

संगीत क्षेत्रात करिअर करायचे असल्यास गोव्यातील कलाकारांना राज्याबाहेर जावे लागते. अशा वेळी गुरुकुल पद्धतीचे शिक्षण कलाकारांना गोव्यातच मिळावे, यासाठी पालयेकर ट्रस्टमार्फत राज्यात संगीत अकादमी उभारण्याचा आपला उद्देश असल्याचे विनोद पालयेकर म्हणाले.

याला सरकारची मदत मिळेल, अशी आशा त्यांनी व्यक्त केली. त्याचप्रमाणे, बार्देश तालुका ही कलाकारांची खाण असून म्हापसा शहरात रवींद्र भवनाची उभारणी लवकरात लवकर व्हावी अशी इच्छा त्यांनी बोलून दाखविली. याविषयी ते कला व संस्कृती मंत्र्यांना विनंती करतील. सध्या बार्देशात संगीत कार्यक्रमांचे आयोजन करायचे असल्यास चांगले व्यासपीठ किंवा जागा उपलब्ध होत नाही, अशी खंत त्यांनी बोलून दाखवली.