बार्देश: म्हापसा मासळी मार्केटमधील घाऊक तसेच किरकोळ मासळी विक्रेत्यातील वाद चिघळण्याची शक्यता आहे. घाऊक पद्धतीने मासळी विक्रीसाठी आणून त्याची किरकोळ पद्धतीने मासळीची विक्री करणाऱ्या व्यावसायिकांनी किरकोळ विक्री बंद करावी, असा इशारा किरकोळ विक्रेत्यांकडून देण्यात आला आहे. घाऊक विक्रेत्यांमुळे किरकोळ विक्रीवर परिणाम होत असल्याचा दावा केला.

येथील मासळी बाजाराच्या बाहेर वाहनातून मासळीची विक्री करण्यास येणाऱ्या घाऊक विक्रेत्यांना सकाळी ७ वाजेपर्यंत त्यांच्या मासळीची विक्री करण्यास दिली जाते; पण हे विक्रेते घाऊक पद्धतीने विक्री करूनही किरकोळ पद्धतीने विक्री करतात, असा बाजारातील किरकोळ विक्रेत्यांचा दावा होता. नुकतीच मासळी बाजारातील विक्रेत्यांकडून घाऊक विक्रेत्यांच्या किरकोळ विक्रीला हरकत घेण्यात आली.

हे विक्रेते मासळीचे वितरण करून सकाळी ७ वाजता निघून न जाता ते ९ वाजेपर्यंत थांबतात. तसेच किरकोळ मासळी विक्री करतात. त्यामुळे ग्राहक मासळी खरेदीसाठी बाजारात येत नसल्याचे विक्रेत्यांचे म्हणणे आहे. पणजी, कळंगुट सारख्या मासळी बाजारात अशा प्रकाराला परवानगी दिली जात नाही.

घाऊक विक्रेते वितरण करून निघून जातात. म्हापशातच असे प्रकार घाऊक विक्रेत्यांकडून केले जातात, असे किरकोळ विक्रेत्यांचे म्हणणे होते.

घाऊक मासळी विक्रेत्यांकडून होणारा किरकोळ विक्रीचा प्रकार सहन केला जाणार नाही. यापूर्वीही त्यांच्यामुळे वाद निर्माण झाला होता. घाऊक विक्रेत्यांनी किरकोळ मासळी विक्री केल्यामुळे किरकोळ विक्रेत्यांच्या व्यवसायावर परिणाम होत आहे. - शशिकला गोवेकर, अध्यक्ष-मासळी विक्रेत्या संघटना