म्हापसा : धुळेर येथील मेसर्स शेटये व्हिजन हॉस्पिटलची रूग्णवाहिका चोरून नेल्याप्रकरणी म्हापसा पोलिसांनी प्रदीप देवू खलप (रा. पीर्ण, बार्देश) याच्याविरुद्ध गुन्हा दाखल केला आहे. संशयित सध्या मनोरुग्णालयात उपचार घेत असल्याची माहिती पोलिसांनी दिली.

ही घटना गुरुवारी (ता. ११) पहाटे सुमारे ५.५० वाजता घडली. चोरीस गेलेल्या जीए-०३-एएच-४२५० क्रमांकाच्या मारुती इको रूग्णवाहिकेची किंमत सुमारे १० लाख रुपये आहे. याप्रकरणी हॉस्पिटलचे प्रशासक इंतेखालो अब्बास शेख यांनी म्हापसा पोलिसांत तक्रार दाखल केली आहे.

हॉस्पिटलच्या इमारतीच्या तळमजल्यावर रूग्णवाहिका पार्क करण्यात आली होती. वाहन चालकाने रूग्णवाहिकेची चावी आतच ठेवली असल्याचा फायदा घेत संशयिताने वाहन सुरू करून तेथून पळ काढला.

संशयित यापूर्वी एका खासगी हॉस्पिटलमध्ये वाहन चालक म्हणून कार्यरत होता. रूग्णवाहिका घेऊन संशयित थेट बांबोळी येथील मनोरुग्णालयात गेला. त्यानंतर पुन्हा तीच रूग्णवाहिका घेऊन तो पीर्ण येथील घरी जात असताना रेवोडा येथे म्हापसा पोलिसांनी वाहन अडवून त्याला ताब्यात घेतले. चौकशीत संशयित मानसिक आजाराने ग्रस्त असल्याचे निष्पन्न झाले.