म्हापसा: गणेशोत्सवाच्या पार्श्वभूमीवर वाढत्या महागाईने त्रस्त सर्वसामान्यांना दिलासा देण्यासाठी म्हापशात स्तुत्य उपक्रम राबविण्यात आला. स्थानिक सामाजिक कार्यकर्ते योगेश केळकर यांनी लोहिया गार्डनजवळील आपल्या दुकानात अवघ्या दोन रुपयांत नारळ उपलब्ध करून दिले.

गोमंतकीय नागरिकांना आधारकार्ड दाखवून प्रतिव्यक्ती पाच नारळ केवळ १० रुपयांत देण्यात आले. बुधवार आणि गुरुवार या दोन दिवसांत सायंकाळी तीन तास हा उपक्रम राबविण्यात आला. नागरिकांचा उत्स्फूर्त प्रतिसाद मिळाल्याने दुकानाबाहेर नारळ घेण्यासाठी लांबच लांब रांगा लागल्या होत्या. नऊ ते दहा हजार नारळांची व्यवस्था करण्यात आली होती.

आठ वर्षांपासून उपक्रम

याबाबत योगेश केळकर म्हणाले की, सणासुदीच्या काळात सर्वसामान्यांना महागाईतून दिलासा मिळावा आणि प्रत्येकाचा गणेशोत्सव आनंदात साजरा व्हावा, या हेतूने गेल्या आठ वर्षांपासून हा उपक्रम राबवत आहोत. यामागे कोणताही राजकीय हेतू नसून, लोकसेवा करणे आणि त्यांच्या सुख-दुःखात सहभागी होणे हेच उद्दिष्ट आहे.