म्हापसा: येथील डांगी कॉलनी भागात रविवारी (ता. १९) दुपारी बांधकाम सुरू असलेल्या एका इमारतीच्या बाल्कनीचा स्लॅब कोसळून दुर्घटना घडली. या अपघातात सहा कामगार किरकोळ जखमी झाले.

पोलिसांनी दिलेल्या माहितीनुसार, रविवारी दुपारी १२ वाजण्याच्या सुमारास ही घटना घडली. इमारतीचे काम सुरू असताना अचानक बाल्कनीच्या स्लॅबचा एक भाग कोसळला. त्यामुळे तेथे काम करत असलेले सहा मजूर जखमी झाले.

दुर्घटनेनंतर तातडीने सर्व जखमी कामगारांना उपचारासाठी उत्तर गोवा जिल्हा रुग्णालयात हलविण्यात आले. सुदैवाने, सर्वांची दुखापत किरकोळ असल्याने प्राथमिक उपचारांनंतर त्यांना रुग्णालयातून घरी सोडण्यात आले.

म्हापसा पोलिसांनी या घटनेची नोंद घेतली असून, स्लॅब नेमका कोणत्या कारणामुळे कोसळला, याचा शोध घेण्यासाठी चौकशी सुरू केली आहे. या प्रकरणाचा पुढील तपास पोलिस करीत आहेत.