Mopa: गोव्यातील मोपा येथे झालेल्या आंतरराष्ट्रीय विमानतळाला कोणाचे नाव द्यायचे यावरून गोव्यात बराच गदारोळ झाला होता. अखेर 11 डिसेंबर रोजी खुद्द पंतप्रधान नरेंद्र मोदी यांच्या उपस्थितीत विमनतळाचे मनोहर इंटरनॅशनल एअरपोर्ट असे नामकरण करण्यात आले. दरम्यान, आता केंद्रीय मंत्रीमंडळानेही या नावावर बुधवारी 4 जानेवारी रोजी शिक्कामोर्तब केले.

मोपा येथील विमानतळाला गोव्याचे पहिले मुख्यमंत्री भाऊसाहेब बांदोडकर यांचे नाव द्यावे, अशी मागणी सुरवातीपासून होत होती. त्यानंतर गोव्याचे पहिले विरोधी पक्षनेते जॅक सीक्वेरा यांचे नाव द्यावे, अशी मागणी काही जणांनी पुढे केली होती. तर भाजपमधून काही जणांनी माजी मुख्यमंत्री मनोहर पर्रीकर यांचे नाव द्यावे, अशी मागणी झाली होती. दरम्यान, मोपा आंतरराष्ट्रीय विमानतळावर उद्यापासून म्हणजेच गुरुवारी 5 जानेवारीपासून सुरू वाहतूक सुरू होणार आहे. विमानसेवेसाठी प्रवाशांना ने-आण करण्यासाठी मोठ्या प्रमाणात वाहनांची रहदारीही सुरू होणार आहे.