गोव्याच्या पर्यटन क्षेत्रासाठी गेमचेंजर म्हणून पुढे आलेल्या मोपा येथील मनोहर आंतरराष्ट्रीय विमानतळाने अत्यंत कमी वेळात तब्बल 10 लाख इतक्या विक्रमी प्रवाशांची ने - आण करून देशातील महत्त्वाच्या व्यग्र ‘टॉप 20’ विमानतळांमध्ये स्थान मिळविले आहे.

अद्यापही या विमानतळावरून आंतरराष्ट्रीय विमान सेवा सुरू झालेली नाही, ती सुरू झाल्यानंतर हे विमानतळ देशातील महत्त्वाचे विमानतळ बनेल अशी आशा आहे.

उत्तर गोव्यासह राज्यासाठी महत्त्वपूर्ण भूमिका बजावत असलेल्या महत्त्वाकांक्षी मोपा विमानतळाचे पंतप्रधान नरेंद्र मोदी यांच्या हस्ते 11 डिसेंबर रोजी उद्‍घाटन झाआले होते. तर प्रत्यक्ष ५ जानेवारीपासून देशांतर्गत विमानसेवा सुरू झाली.

गेल्या 116 दिवसांमध्ये या विमानतळावर विविध कंपन्यांच्या विमानांतून तब्बल 10 लाख प्रवाशांनी प्रवासाचा आनंद घेतला आहे. मनोहर विमानतळाने एप्रिलपर्यंत तीन नवी शहरे जोडून देशातील 25 विमानतळांशी संपर्क वाढवला आहे.

"दशलक्ष प्रवासी मैलाचा दगड गाठणे, हा एक प्रशंसनीय टप्पा आहे. आम्हाला आणखी बरेच टप्पे गाठायचे आहेत. आम्ही आमचे भागीदार, प्रवासी आणि सर्व भागधारकांना विमानाची उत्कृष्ट देण्यासाठी वचनबद्ध आहोत. आंतरराष्ट्रीय मनोहर विमानतळ निवडलेल्या आमच्या प्रवाशांना सेवा देणाऱ्या टीमच्या प्रत्येक सदस्याचेही यात योगदान आहे."

आर. व्ही. शेषन, सीईओ-''जीएमआर’