Panjim: मोपा येथील मनोहर आंतरराष्ट्रीय विमानतळावरून पहिले विमान उतरवण्याचा मान मिळविलेल्या इंडिगो कंपनीने ‘मोपा’वरून आठवड्यात 168 उड्डाणे केली जातील, असे सांगून देशातील प्रमुख आठ शहरांना जोडत असल्याची घोषणा ‘इंडिगो’चे मुख्य कार्यकारी अधिकारी पीटर एल्बर्स यांनी काल केली.

एल्बर्स म्हणाले,की आपले आंतरदेशीय नेटवर्क अधिक सक्षम करण्याच्या उद्देशाने इंडिगो या देशातील आघाडीच्या ‘कॅरियर’ने आज मनोहर आंतराष्ट्रीय विमानतळावरून उड्डाणांची सुरुवात केली आहे. हैद्राबाद आणि गोवा या दरम्यान हे पहिले उड्डाण होते.

‘इंडिगो’कडून मोपा विमानतळावरून आठवड्याला 168 उड्डाणे होणार असून देशांतर्गत 8 स्थळांमध्ये हैद्राबाद, दिल्ली, मुंबई, बंगलोर, चेन्नई, पुणे, जयपूर आणि अहमदाबाद यांचा समावेश आहे.

नव्या नेटवर्क मुळे गोव्याची वाढती लोकप्रियता लक्षात घेऊन त्यांची मागणी पूर्ण होणार असून गोवा हे पर्यटकांचे आवडते स्थळ असल्यामुळे आता ग्राहकांना नवीन पर्याय उपलब्ध होऊन प्रवासही अधिक परवडणारा आणि उत्तर गोव्याच्या प्रगतीसाठी परिणामकारक ठरू शकेल, असेही ते म्हणाले.

दक्षिण गोव्यात दाबोळी विमानतळावरून कार्यरत असलेली विमानसेवा आणि उड्डाणे पूर्वीप्रमाणे सुरूच राहतील. परवडणारे दर, वेळेतील कार्यक्षमता, नम्र आणि सोपी सेवा, जोडणी ही लोकांच्या आवडीच्या ठिकाणी उपलब्ध करून देण्याच्या आमच्या वचनावर ठाम आहोत,असे पीटर एल्बर्स म्हणाले.