मोरजी: मांद्रेचे आमदार जीत आरोलकर यांनी मतदारसंघाच्या विकासासाठी प्रयत्न करावेत. केवळ मांद्रे पंचायत क्षेत्रात राजकारण आणून विकासाला खो घालू नये किंवा एकमेकांत भांडणे लावण्याचाही प्रयत्न करू नये. अन्यथा एक दिवस सगळी प्रकरणे बाहेर काढू, असा इशारा मांद्रे सरपंच प्रशांत नाईक, पंच ॲड. अमित सावंत यांनी पत्रकार परिषदेत दिला.

मांद्रे पंचायत क्षेत्रातील प्रमुख रस्त्यांवरून भूमिगत वीजवाहिनी घालण्यासाठी हे रस्ते मधोमध खणले होते. पावसाळ्यापूर्वी रस्त्यांची डागडुजी करू, असे जाहीर केले होते. आमदार जीत आरोलकर यांनी रस्त्याची डागडुजी करण्याविषयी ‘साबांखा’ला वारंवार सांगितले.

परंतु कोणीच दखल घेतली नाही, अशी कैफियत पंचायत मंडळासमोर हडफडकर यांनी मांडली. परंतु नंतर लगेच त्‍यांनी आरोलकर यांच्या समर्थनार्थ प्रतिक्रिया दिल्या. यातून त्यांनी पंचायतीची दिशाभूल केल्याचा दावा यावेळी करण्‍यात आला.