Goa News: मांद्रे मतदारसंघात ठिकठिकाणी भूमिगत वीज वाहिन्या टाकण्याचे काम युद्धपातळीवर सुरु असल्याने त्याचा वाहतुकीवर जसा परिणाम होत आहे. त्याही पेक्षा जेसीबीने ठिकठिकाणी रात्री-अपरात्री रस्ते खोदणे चालू असल्याने मोठ्या प्रमाणात जलवाहिन्या फुटण्याचे प्रकार चालू आहेत.

त्याचा फटका नागरिकांना बसत आहे. फोडल्या जाणाऱ्या जलवाहिन्यांमुळे पाणी पुरवठ्यावर परिणाम होत असून नागरिकांना पाणी टंचाईचा सामना करावा लागत आहे.

मंगळवारी रात्री 11 वाजण्ययाच्या सुमारास आगरवाडा येथील सार्वजनिक गणेश पूजन स्थळापासून जवळच रस्त्याच्या मध्यभागी भूमिगत वीज केबल्स टाकण्यासाठी जेसीबीने रस्ता खोदण्याचे काम चालू असताना मोठी जलवाहिनी फुटली.

त्यामुळे रस्त्यावर पाण्याचे ओहळ वाहू लागले. प्रचंड प्रमाणात जलवाहिन्यांतून पाणी बाहेर पडू लागल्याचे दृष्य जवळ जवळ दोन तास चालू होते. याचा त्रास वाहनचालक व नागरिकांना सहन करावा लागला.

कामगार पाण्याचा प्रवाह रोखण्याचा प्रयत्न करीत होते. रस्त्याच्या मधोमध चर खोदल्याने वाहतूकही पूर्णपणे बंद पडली होती. अखेर कामगारांनी तास-दोन तास झुंज देऊन जलवाहिन्या दुरुस्त करण्यास यश मिळवले.

रस्त्याच्या मधोमध मातीचा ढिगारा उभा करून खोदलेला रस्ता कसाबसा बुजवण्यात आला. मात्र रस्त्याच्या मध्यभागी उंचवटा राहिल्याने त्याचा फटका वाहनचालकांना बसत होता.

वाहनचालकांना मनःस्ताप

रस्ता कंत्राटदाराची मनमानी वाढत असून मांद्रे त ठिकठिकाणी एकाच वेळेला रस्ता खोदण्याचे काम चालू असल्याने वाहन कोणत्याही रस्त्याने वळविले तरी वाहन चालक अडकून पडतात. दिवसा व रात्री पूर्वसूचना न देता काम सुरू असल्याने वाहनचालकांना प्रचंड मनस्ताप सहन करावा लागत आहे