Mandrem: चित्रपट अभिनेते नागार्जुन राव यांनी मांद्रे पंचायत क्षेत्रातील आश्वे-मांद्रे येथील सर्वे क्रमांक 211,12 बी या जागेमध्ये बेकायदा बांधकाम सुरू केले होते. या बांधकामाला स्थगिती देण्यासाठी मांद्रेचे सरपंच ॲड. अमित सावंत यांनी 21डिसेंबर रोजी नोटीस पाठवली होती.

आता त्याची कार्यवाही करण्यासाठी शनिवार, 7 रोजी या बांधकामाची पाहणी करून पुढील कार्यवाहीसाठी अहवाल पाठवला जाणार आहे.

मांद्रे पंचायत क्षेत्रातील आजोबा मंदिराच्या वरच्या भागात सुप्रसिद्ध सिने अभिनेते नागार्जुन राव यांचे बांधकाम सुरू होते. ते काम 21 रोजी लेखी नोटीस पाठवून बंद केले होते.

मांद्रे मतदारसंघातील किनारी भागात आणि डोंगर माळरानावर सध्या बिगर गोमंतकीय दिल्लीतील व्यावसायिकांनी जमिनी विकत घेतल्या आहेत.

या ठिकाणी पर्यावरणाचा ऱ्हास करून बांधकामे उभी केली जात आहेत. त्याच पद्धतीने सिने अभिनेते, चित्रपट निर्माते, क्रिकेटपटूही जमिनी विकत घेऊन त्या ठिकाणी बांधकामे करत आहेत.

मांद्रेचे सरपंच ॲड. अमित सावंत म्हणाले, की मांद्रे पंचायत क्षेत्रात यापुढे कुणालाही बेकायदेशीर बांधकाम करण्यास थारा दिला जाणार नाही. ज्यांनी ज्यांनी अजून परवाने घेतलेले नाहीत, त्यांनी परवाने घ्यावेत. अन्यथा बेकायदेशीर बांधकामांविरोधात आम्हाला पावले उचलावी लागतील. डोंगर माळरानावरही बेकायदेशीर बांधकामे उभारली आहेत.