Mandrem Panchayat Hill Cutting News

मोरजी: मांद्रे सरपंचपदी मिंगेल उर्फ रोजा फर्नांडिस यांची बिनविरोध निवड करण्यात आली. भविष्यात मांद्रे पंचायत क्षेत्रात मोठ्या प्रमाणात होणाऱ्या डोंगर कापणीला आळा घालण्यासाठी पंचायत मंडळ प्रयत्न करणार असल्याचे मिंगेल यांनी निवडीनंतर सांगितले.

एकूण नऊ पंच सदस्यांनी त्यांना पाठिंबा दिला. उर्वरित आठ पंच सदस्यांना समान कार्यकाळाची विभागणी करून सरपंचपदाची संधी मिळणार आहे. २७ रोजी मांद्रे पंचायत मंडळाची विशेष बैठक आयोजित करून सरपंचपदासाठी निवडणूक घेण्यात आली.

त्यावेळी मिंगेल यांचा एकमेव अर्ज आल्याने त्यांची बिनविरोध निवड झाली. मांद्रे मतदारसंघाचे आमदार जीत आरोलकर यांनी नवनिर्वाचित सरपंच मिंगेल फर्नांडिस यांचे अभिनंदन केले. यावेळी मिंगेल म्हणाले की, संपूर्ण पंचायत क्षेत्राचा सर्वांगीण विकास करण्यास आम्ही प्रयत्नशील आहोत.