पणजी: गोव्यातील पर्यटन व्यवहारांमध्ये पारदर्शकता, उत्तरदायित्व आणि कायदेशीर अनुपालन सुनिश्चित करण्याच्या उद्देशाने पर्यटन खात्याने राज्यात कार्यरत असलेल्या सर्व ऑनलाइन ट्रॅव्हल अ‍ॅग्रीगेटर्ससाठी (ओटीएंनी) अधिकृत नोंदणी अनिवार्य केली आहे.

या निर्णयानुसार, गोवा पर्यटन व्यापार नोंदणी कायदा, १९८२ आणि नियम १९८५ यांच्या अधीन राहून, सर्व ओटीएंनी परिपत्रक प्रसिद्ध झाल्यापासून १५ कामकाजाच्या दिवसांत आपली नोंदणी पूर्ण करणे आवश्यक आहे.

पर्यटन खात्याने दिलेल्या माहितीनुसार पर्यटन खात्याच्या निरीक्षणात असे आढळून आले आहे की, अनेक ऑनलाइन ट्रॅव्हल अ‍ॅग्रीगेटर्स कोणतीही परवानगी, एन.ओ.सी. किंवा अधिकृत परवाना न घेता थेट ग्राहकांकडून गोव्यातील पर्यटन सेवा जसे की हॉटेल बुकिंग, ट्रान्स्पोर्ट, टूर पॅकेजेस इ.साठी ऑनलाइन बुकिंग स्वीकारत आहेत.

ही कृती कायद्याचे उल्लंघन असून, त्यामुळे राज्याच्या पर्यटन व्यवस्थापनावर परिणाम होतो. यामुळेच पर्यटन खात्याने सर्व ओटीएंना कायदेशीर चौकटीत आणण्यासाठी हे पाऊल उचलले आहे.

नव्या नियमनाचा स्वीकार करा

पर्यटन खात्याने स्पष्ट केले आहे की, निर्धारित मुदतीत नोंदणी न करणाऱ्या ओटीएंवर कठोर कारवाई केली जाईल. यामध्ये आर्थिक दंड, कारवाई आणि भविष्यकाळात गोव्यातील पर्यटन व्यवहारांमधून प्रतिबंधाची शक्यता असू शकते. गोवा सरकारने पर्यटन हा राज्याच्या अर्थव्यवस्थेचा कणा मानला असून, सर्व संबंधित व्यावसायिक घटकांनी कायदेशीर मार्गाने कार्य करणे अत्यावश्यक असल्याचे पुनः स्पष्ट केले आहे. यासाठी, सर्व ऑनलाईन ट्रॅव्हल अ‍ॅग्रीगेटर्सना पर्यटन खात्याच्या या नव्या नियमनाचा तत्काळ स्वीकार करणे आणि आवश्यक ती नोंदणी लवकरात लवकर पूर्ण करणे अत्यावश्यक आहे.