राज्यात सध्या कॅश फॉर जॉब प्रकरणावरुन राजकीय वादंग माजला असतानाच आणखी एक फसणूकीची घटना समोर आली आहे. पंतप्रधान कार्यालयात सिक्युरिटी इन्चार्ज असल्याचे भासवून राज्यातील टॅक्सीचालकांना गंडा घालण्यात आला. श्रीरंग जावळ असे या गंडा घालणाऱ्या व्यक्तीचे नाव आहे.

टॅक्सीवाल्यांनी त्याच्याविरुद्ध कळंगुट पोलिस ठाण्यात तक्रार दाखल केली. एवढ्यावरच न थांबता टॅक्सीवाल्यांनी तात्काळ त्याच्या अटकेची मागणी केली. जावळ याच्याविरोधात फसवणूक केल्याचा आरोप यावेळी टॅक्सीचालकांकडून करण्यात आला. एका व्यक्तीने सांगितले की, तो उत्तर गोव्यातील टॅक्सी चालकांना धमकावत असत.

टॅक्सी चालकांच्या म्हणण्यानुसार, तो फिरण्यसाठी टॅक्सी भाड्याने घ्यायचा मात्र पैसे देत नसत. त्याच्याविरोधात यापूर्वी अनेक तक्रारी दाखल झाल्या आहेत.

काही दिवसांपूर्वी, सीबीआय अधिकारी असल्याचे भासवून गंडा घातल्याची अशीच घटना बेतोड्यातून समोर आली होती. आम्ही पोलिस अधिकारी आहोत. थोड्या वेळापूर्वीच काही अंतरावर मोठी लूट झाली आहे. त्यामुळे अंगावरील दागिने सांभाळा, अशी बतावणी करुन दोघा भामट्यांनी एका महिलेचे मंगळसूत्र, पाटल्या, तोडे असे मिळून लाखो रुपयांचे दागिने हातोहात पळवले होते. ही घटना बस्तोडा जंक्शनवर घडली होती.

दोघेही संशयित हे काळ्या रंगाच्या दुचाकीवरुन आले होते. ते साध्या वेशातच होते. मात्र ते हिंदी भाषेत बोलत होते. आम्ही सीबीआयवाले पोलिस आहोत, असे भासवून तोतया पोलिसांनी या दांपत्यास गंडवले.