काझीपेट: मित्रांसोबत गोव्याला निघालेला एक व्यक्ती त्यांच्या ग्रुपपासून दुरावला. लघुशंकेसाठी तो ट्रेनमधून खाली उतरला अन् पुन्हा येईपर्यंत ट्रेन प्लॅटफॉर्मवरुन निघून गेल्याने त्याची चुकामूक झाली. पण, रेल्वे मदत अ‍ॅप, रेल्वे पोलिस आणि रेल्वे पदाधिकारी यांच्या मदतीने हा व्यक्ती पुन्हा त्या ग्रुपसोबत एकत्र आला. बुधवारी (१० जून) तेलंगणातील काझीपेट रेल्वे जंक्शनवर ही घटना घडली.

समोर आलेल्या माहितीनुसार, रायपूर येथील ३५ जणांचा ग्रुप ट्रेन नंबर १७३२२ मधून रात्री ९.३० वाजता गोव्याला निघाला. मंगळवारी घाणपूर येथे ट्रेनने थांबा घेतला. यावेळी कृष्णा पटेल हा प्रवासी लघुशंकेसाठी खाली उतरला. दरम्यान, तो माघारी येईपर्यंत ट्रेन प्लॅटफॉर्मवरुन पुढे निघून गेली होती. यामुळे ३५ जणांच्या ग्रुपपासून तो दुरावला.

याच ग्रुपमधील प्रवासी रुपेश कुमारला त्यांचा साथीदार कृष्णा पटेल बेपत्ता असल्याचे निदर्शनास आले. रुपेशने रेल्वे अ‍ॅपची मदत घेऊन घटनेची माहिती दिली. प्राप्त तक्रारीच्या आधारे रेल्वे अधिकाऱ्यांनी घाणपूर रेल्वे पोलिसांना याची माहिती दिली. पोलिसांनी पटेल यांना शोधून सोबत घेतले. पटेल यांना काझीपेट येथे जंक्शनवर आणण्यात आले.

यानंतर पटेल प्रवास करत असलेल्या सोबतच्या ग्रुपला संपर्क साधण्यात आला. ग्रुपमधील दोघांनी घटनेची माहिती घेऊन काझीपेट येथे येत मित्र कृष्णाची भेट घेतली. यानंतर तिघांनी दुसऱ्या ट्रेनमधून गोव्याला प्रवास केला.