म्हापसा: मालपे-पेडणे येथे महामार्गावर कळंगुट येथील ५५ वर्षीय टॅक्सीचालकाला जबर मारहाण प्रकरण हे आंतरराज्य टोळीशी निगडित आहे, असे पोलिस तपासातून पुढे आले आहे. याप्रकरणी गोवा व महाराष्ट्र पोलिस हे संयुक्तपणे तपास करीत आहेत. या टोळीचे धागेदोरे पुणे आणि पंढरपूरपर्यंत पसरले आहेत, असे सूत्रांनी सांगितले.

विशेष म्हणजे, ज्या टोळीने हा हल्ला केला, यातील सहभागी दोघा पारधी टोळीच्या सराईत म्होरक्यांना अटक करण्यात सिंधुदुर्ग पोलिसांना यश आले आहे. सूत्रांनी दिलेल्या माहितीनुसार, मालपे येथील हल्ला प्रकरणातील टोळीत सहाजणांचा समावेश होता.

यात एक अल्पवयीनही आहे. ही टोळी महाराष्ट्रातील पारधी गँग असून यातील दोघांना पकडण्यात महाराष्ट्र पोलिसांना यश आले असून उर्वरितांचा पोलिस शोध घेत आहेत. शंकर मधुकर पवार(वय २७ वर्षे) आणि राजू मधुकर पवार (वय २५ वर्षे) अशी अटक केलेल्या संशयितांची नावे आहेत.

बुधवारी (ता.९) रात्री मालपे येथे संजीवन वेंगुर्लेकर यांच्यावर या आंतरराज्य टोळीने हल्ला करून घटनास्थळावरून पोबारा केला होता. यात ते गंभीर जखमी झाले होते. हल्ल्यानंतर संशयितांनी सावंतवाडीच्या दिशेने पळ काढला होता. या टोळीकडे धारदार शस्त्रे होती.या घटनेनंतर या टोळीने सावंतवाडीमध्ये चोरी केली. तिथे टोळीने दोन मोटरसायकल व मोबाईल चोरले. संशयितांनी एका बंगल्यामधून किमती ऐवज चोरला.

‘त्या’ दोघांच्या सहभागाची शक्यता

शुक्रवारी जुने गोवे पोलिसांनी हुबळी येथे दोघा संशयितांना अटक केली होती. या संशयितांचा या प्रकरणाशी संबंध असल्याची शक्यता असल्याने सोमवारी किंवा मंगळवारी पेडणे पोलिस जुने गोवे येथे या संशयितांची चौकशी करणार आहेत. या प्रकरणात ५ ते ६ गट सामील असून त्यापैकी एका गटातील हे दोघे असल्याचा संशय आहे.