डिचोली : मकरसंक्रांतीमुळे सध्या डिचोलीचा बाजार फुलांनी फुलला असून, मागणी असल्याने सध्या फुलांना ‘अच्छे दिन’ आले आहेत. हळदीकुंकवावेळी फुलांची आवश्यकता असल्याने मकरसंक्रांती ते रथसप्तमीपर्यंत फुलांचा रुबाब दिसून येणार आहे. फुलांना मागणी असल्याने सध्या फुलेही महागली आहेत.

सध्या फुलांच्या दरात 60 टक्क्यांनी वाढ झाली असून, फुलांचा तुटवडा निर्माण झाल्यास फुले आणखीही महागण्याची शक्यता आहे. हिंदू धार्मियांचे सण, उत्सव म्हटले, की फुलांना मागणी असते. सुवासिनींचा आनंद द्विगुणित करणारा नववर्षातील पहिला सण म्हणजे मकरसंक्रांती. मकरसंक्रांतीपासून घरोघरी ‘हळदीकुंकू’चे कार्यक्रम होतात. त्यामुळे या सणकाळात फुलांना प्रचंड मागणी असते.

मकरसंक्रांतीमुळे सध्या बाजारात विविध प्रकारच्या फुलांची आवक झाली असून, खरेदीलाही जोर आला आहे. डिचोलीत कर्नाटक आणि कोल्हापूर आणि महाराष्ट्र राज्यातून ठराविक फुलांची आवक होत असते. सध्या डिस्को शेवंतीसह लांब देठाची शेवती, लहान गुलाब आदी फुले बाजारात उपलब्ध झाली आहेत. फुलांना मागणी असली, तरी त्यातल्या त्यात ‘डिस्को शेवंती’चा रुबाब वाढला आहे. ‘अस्टर’ फुलांचा मात्र बाजारात तुटवडा आहे.

भाव वधारले

मागील महिन्याच्या तुलनेत फुलांच्या दरात किमान 60 टक्के वाढ झाली आहे. सध्या घाऊक विक्रेत्यांकडे डिस्को शेवंतीसह अन्य प्रकारची फूले प्रति किलो 400 रुपये दराने विकण्यात येत आहेत. फुले महाग झाल्याने फाती, वेणी, गजरे आणि हार यांचेही दर दुप्पट झाले आहेत. फुलांचे घाऊक दर वाढल्याने फाती, वेणी, हार यांचे दर वाढवावे लागले आहेत, असे बाजारातील फुलविक्रेती सीमा नाईक हिने सांगितले.