माडेल-थिवी येथे राष्ट्रीय महामार्गावर बार्देशला पाणीपुरवठा करणारी मुख्य जलवाहिनी फुटल्याचा प्रकार आज सकाळी 6 वाजता उघडकीस आला. यामुळे काल दिवसभर बार्देश तालुक्यात मर्यादित पाणी पुरवठा झाला असून आज गुरुवारीही अशीच स्थिती राहिल.

चाळीस वर्षांची ही जुनी जलवाहिनी आहे. सार्वजनिक बांधकाम खात्याच्या पाणीपुरवठा विभागाकडून ही वाहिनी दुरुस्त करण्यात येत असल्याचे सहाय्यक अभियंता जुझे काल्देरो यांनी सांगितले.

या भागांवर परिणाम

वाहिनी फुटल्यामुळे पाणीपुरवठा बंद असल्याने गुरुवारीही बार्देश तालुक्याला मर्यादित पाणीपुरवठा राहील. तर गिरी, साळगाव आसगाव, हणजूण, वागातोरचा पाणीपुरठा पूर्णतः बंद करण्यात आला आहे. कळंगुट, पर्रा, थिवी, म्हापसा, बस्तोडा, उसकई आदी ठिकाणी पाणीपुरवठ्यावर अंशतः परिणाम राहील.